برازیل کے ایئرپورٹ سے ڈاکو 234 کروڑ روپے کا سونا لوٹ کر فرار ہونے میں کامیاب

ساؤ پالو: لیٹن امریکہ کے مصروف ترین ہوائی اڈوں میں سے ایک برازیل کے ساؤ پاؤلو کے گوارو لوس بین الاقوامی ہوائی اڈے پر آٹھ مسلح ڈاکؤوں کے ایک گروہ نے 750 کلوگرام کا سونا لوٹ لیا۔ افسران نے یہ اطلاع فراہم کرتے ہوئے کہا کہ مسلح ڈاکو برازیل کے فیڈرل پولس افسران کا بھیس بدل کر آئے اور 3 کروڑ ڈالر (تقریباً 234 کروڑ انڈین روپے) سے زیادہ قیمت کا سونا لوٹ کر فرار ہو گئے۔

غیر ملکی خبر رساں ایجنسی کے مطابق ڈکیتی کا یہ واقعہ جمعرات کے روز پیش آیا جب ملک کے سب سے بڑے ایئرپورٹ سے متعلق ایک گودام میں ڈاکؤوں کا گروہ فیڈرل پولس کی وردی اور بیج کے ساتھ اسالٹ رائفل لے کر دو گاڑیوں میں پہنچا۔

اس کے بعد ڈاکؤوں نے بلند آواز میں کہا کہ یہ ڈکیتی ہو رہی ہے۔ انہوں نے سونے کو ایک بکتر بند گاڑی میں منتقل کیا اور جاتے وقت 2 لوگوں کو بھی یرغمال بنا کر ساتھ لے گئے۔یرغمال بنانئے گئے لوگوں میں سے ایک ٹرمنل کا اسسٹنٹ سپروائزر تھا۔

رپورٹوں کے مطابق لوٹ کی واردات کو 8 افراد نے انجام دیا، جن میں سے چار افراد اپنا چہرہ ڈھانپے گاڑی سے باہر نکلے جن میں سے ایک کے پاس رائفل بھی تھی۔ اس کے بعد انہوں نے ایئر پورٹ کے ورکرز سے اسلحہ کے زور پر 750 کلو گرام سونا اور دیگر قیمتی دھاتیں بھی چھین کر فرار ہو گئے۔ میڈیا رپورٹوں کے مطابق یہ سونا نیویارک اور زیورخ پہنچایا جانا تھا۔

گوارولوس ایئرپورٹ سے 12 کلومیٹر دو لاوارث چھوڑی گئی دو گاڑیوں سے یرغمال بنائے گئے دونوں افراد کو آزاد کرا لیا گیا ہے۔ اسسٹنٹ سپروائزر نے افسران سے کہا کہ اس سے ایک دن پہلے ڈاکؤوں نے اس کے اہل خانہ کو یرغمال بنا لیا تھا اور ڈکیتی کے بعد انہیں سہی سلامت چھوڑنے کی بات کہی تھی۔

سپر وائزر نے بتایا کہ سونے کو ایک سفید شیورلے ایس 10 پک ٹرک اور ایک امبولنس میں لوڈ کر لی گیا۔ پولس کا خیال ہے کہ مجرموں نے سپروائزر کے اہل خانہ کو یرغمال بنا کر اس سے اہم معلومات حاصل کیں۔