ایپل کے ’سی ای او‘ نے ٹوئٹر کو ایپ اسٹور سے ہٹانے پر کبھی غور نہیں کیا: مسک

واشنگٹن: ٹوئٹر کے سربراہ ایلن مسک نے کہا ہے کہ ایپل کے سی ای او ٹم کک نے سوشل میڈیا پلیٹ فارم ٹوئٹر کو اپنے ایپ اسٹور سے ہٹانے کے بارے میں کبھی نہیں سوچا تھا۔ ایلن مسک نے ایپل کے ہیڈ کوارٹر میں ایک میٹنگ کے بعد کہا ’’اچھی بات چیت ہے۔ ایپل کے ایپ اسٹور سے ٹوئٹر کو ممکنہ طور پر ہٹائے جانے کے بارے میں غلط فہمیوں کو دور کر دیا گیا ہے۔ ٹم کک نے واضح کیا کہ ایپل نے کبھی اس بارے میں غور نہیں کیا۔

پیر کے روز ایلن مسک نے ایپل پر ٹوئٹر کو اپنے ایپ اسٹور سے بلاک کرنے کی دھمکی دینے کا الزام لگاتے ہوئے ٹوئٹس کی ایک سیریز میں کہا کہ ایپل نے ٹوئٹر پر اشتہارات بھی بند کر دیئے ہیں۔ بعد میں انہوں نے ایک اور ٹوئٹ میں ٹم کک کے ٹوئٹر اکاؤنٹ کو ٹیگ کرتے ہوئے پوچھا ’’یہاں کیا ہو رہا ہے؟‘‘

ایپل نے ایلن مسک کے تازہ ترین ٹوئٹ پر تبصرہ کرنے کی درخواستوں کا فوری طور پر جواب نہیں دیا۔ ایپل نے ایلن مسک کے پہلے ٹوئٹس کا بھی عوامی طور پر ردعمل نہیں دیا ہے۔ ایلن مسک نے اکتوبر میں ٹوئٹر حاصل کیا تھا اور اس نے سابق صدر ڈونالڈ ٹرمپ سمیت متعدد معطل شدہ اکاؤنٹس کو بحال کر دیا ہے۔ ان کا کہنا تھا کہ اگر ایپل یا گوگل ٹوئٹر کو اپنے ایپلی کیشن اسٹور سے ہٹا دیں تو وہ نیا اسمارٹ فون بنائیں گے۔