ٹل گیا ایک اور ریل حادثہ، دہلی-بھونیشور راجدھانی ایکسپریس حادثے سے بال بال بچی

دہلی-بھونیشور راجدھانی ایکسپریس مغربی بنگال کے پرولیا ضلع میں سنتال ڈیھ اسٹیشن کے قریب حادثے سے بال-بال بچ گئی۔ ٹرین ایک ریلوے کراسنگ پر پٹریوں پر پھنسے ڈیزل سے بھرے ٹریکٹر کو چھوتے ہوئے نکل گئی۔ واقعہ منگل کی شام کا ہے۔ راجدھانی ایکسپریس کے ڈرائیور نے دور سے ٹریکٹر کو دیکھا اور فوری طور پر ٹرین کی رفتار کم کر دی۔ حالانکہ انجن کے پیچھے دو ڈبے ٹریکٹر کو چھوتے ہوئے نکل گئے۔ ٹرین بال بال بچ گئی۔

اس کے بعد ٹرین وہاں سے تقریباً 45 منٹ کی تاخیر سے چلی، ڈویژنل ریلوے منیجر (ادرا ڈویژن) منیش کمار نے میڈیا والوں کو بتایا کہ کسی نقصان کی کوئی اطلاع نہیں ہے۔ تاہم ریلوے ذرائع نے بتایا کہ پھاٹک پر نظر رکھنے والے کو معطل کر دیا گیا ہے اور اس معاملے کی محکمانہ انکوائری شروع کر دی گئی ہے۔

ٹرین نئی دہلی سے بھونیشور جا رہی تھی۔ چونکہ سنتال ڈیھ اسٹیشن پر کوئی طے شدہ اسٹاپ نہیں تھا، اس لیے ٹرین کی رفتار تیز تھی۔ لیکن ڈرائیور کی سوجھ بوجھ کی وجہ سے بڑا حادثہ ٹل گیا۔ اگر اس نے دور سے ٹریکٹر نہ دیکھا ہوتا اور رفتار کم نہ کی ہوتی تو اڈیشہ کے بالاسور میں ٹرین سانحہ کے صرف چار دن بعد ایک اور بڑا حادثہ رونما ہو سکتا تھا۔