اڈیشہ ٹرین حادثہ میں ایک اور زخمی کی موت، ہلاک شدگان کی تعداد بڑھ کر 290 ہو گئی

بھونیشور: اڈیشہ ٹرین حادثے میں زخمی ہونے والے ایک شخص کی موت ہو گئی۔ اس کے ساتھ ہی مرنے والوں کی تعداد 290 ہو گئی ہے۔ حکام نے جمعہ کو یہ اطلاع دی۔ حکام نے بتایا کہ بہار کا رہنے والا پرکاش رام کٹک کے ایس سی بی میڈیکل کالج اور اسپتال کے سرجری وارڈ میں زیر علاج تھا اور جمعہ کی صبح اس کی موت ہو گئی۔

اسپتال انتظامیہ نے مقامی پولیس کو موت کی اطلاع دی۔ پوسٹ مارٹم کے بعد لاش کو پرکاش کے لواحقین کے حوالے کر دیا جائے گا۔ لگ بھگ 200 شدید زخمی متاثرین کو کٹک کے ایس سی بی میڈیکل کالج میں داخل کرایا گیا، جن میں سے کئی کو فارغ کر دیا گیا ہے، جب کہ دو یا تین کی حالت نازک ہے۔

دریں اثنا، ایمس بھونیشور میں محفوظ 81 لاشوں کی شناخت ہونا باقی ہے۔ دعویدار ڈی این اے ٹیسٹ کی رپورٹ کا انتظار کر رہے ہیں۔ ذرائع کے مطابق مجموعی طور پر 78 خاندانوں نے ڈی این اے کے نمونے دیئے ہیں۔

خیال رہے کہ 2 جون کی شام کو اڈیشہ کے بالاسور ضلع میں چنئی جانے والی کورومنڈل ایکسپریس، ہاوڑہ جانے والی ایس ایم وی پی-ہاؤڑا سپر فاسٹ ایکسپریس اور مال بردار ٹرین آپس میں ٹکرا گئی تھیں۔ اس حادثے میں 290 لوگوں کی موت ہو گئی تھی۔