مرکزی وزیر سنجیو بالیان کے دوسرے چچازاد بھائی کا بھی کورونا سے انتقال

بی جے پی لیڈر اور مرکزی وزیر سنجیو کمار بالیان کے چچازاد بھائی جتیندر بالیان کا کورونا سے انتقال ہوئے ابھی ایک ہفتہ بھی نہیں گزرا ہے اور اسپتال میں زیر علاج سنجیو بالیان کے دوسرے چچازاد بھائی کا بھی کورونا انفیکشن کے سبب آج انتقال ہو گیا۔ چچازاد بھائی راہل بالیان کا جمعہ کے روز رشی کیش واقع ایمس میں کووڈ-19 انفیکشن کے علاج کے دوران انتقال ہو گیا۔ یہ اطلاع سنجیو بالیان کے قریبی ذرائع نے میڈیا کو دی۔

زراعت اور فوڈ پروسیسنگ کے وزیر مملکت کے ایک پرسنل اسسٹنٹ نے بتایا کہ سنجیو بالیان کے 61 سالہ چچازاد بھائی راہل بالیان کورونا وائرس سے متاثر پائے جانے کے بعد 30 اپریل کو رشی کیش واقع ایمس میں داخل کیے گئے تھے اور تب سے ان کا وہاں علاج جاری تھا۔ انھوں نے کہا کہ کورونا انفیکشن کے سبب آج اسپتال میں ہی ان کا انتقال ہو گیا۔ تین دن پہلے ہی ان کے چچازاد بھائی جتیندر بالیان کا بھی کووڈ-19 کا علاج کراتے ہوئے ہی انتقال ہو گیا تھا۔