ایئر انڈیا کے خلاف پھر ملی شکایت، اس بار کھانے میں ایک خاتون مسافر کو ملا پتھر کا بڑا ٹکڑا

گزشتہ کچھ ماہ میں ہندوستانی ایئرلائنز کمپنیاں غلط اسباب کی وجہ سے کچھ زیادہ ہی سرخیوں میں رہی ہیں۔ حیرانی کی بات یہ ہے کہ ایئر انڈیا جیسی ایئرلائنز بھی مسافروں کو معیاری خدمات نہیں دے پا رہی ہیں۔ تازہ معاملہ فلائٹ میں پیش کردہ کھانے میں کنکڑ ملنے کا ہے جس کو لے کر ایک خاتون مسافر نے شکایت کی ہے۔

خاتون مسافر نے کھانے میں بڑا سا کنکڑ یعنی پتھر کا ٹکڑا ملنے کی تصویر ٹوئٹر پر شیئر کی ہے اور دعویٰ کیا ہے کہ ایئر انڈیا کی فلائٹ میں دیئے گئے کھانے میں اسے پتھر کا یہ ٹکڑا ملا ہے۔ خاتون نے دعویٰ کیا ہے کہ اس نے کرو ممبر کو بھی اس تعلق سے جانکاری دی ہے اور اس طرح کی لاپروائی پر اس نے شدید ناراضگی کا اظہار کیا ہے۔

خاتون نے اپنے ٹوئٹ میں لکھا ہے کہ ’’ایئر انڈیا آپ کو بغیر پتھر والے کھانے کو یقینی بنانے کے لیے وسائل اور دولت کی ضرورت نہیں ہے۔ آج کی پرواز اے آئی 215 میں دیئے گئے میرے کھانے میں مجھے یہی ملا۔ کرو ممبر جادون کو بتا دیا گیا ہے۔ اس طرح کی لاپروائی ناقابل قبول ہے۔‘‘ اس ٹوئٹ پر ایئر انڈیا نے ریپلائی بھی دیا ہے۔ ایئرلائنز نے لکھا ہے ’’محترمہ، یہ افسوسناک ہے اور ہم اسے فوراً اپنی کیٹرنگ ٹیم کے سامنے رکھ رہے ہیں۔ برائے کرم ہمیں اس معاملے کو دیکھنے کے لیے کچھ وقت دیں۔ اسے ہماری جانکاری میں لانے کے لیے ہم آپ کی تعریف کرتے ہیں۔‘‘

اس معاملے میں ایک ٹوئٹر صارف نے ٹاٹا کمپنی سے شکایت کی ہے۔ اس نے لکھا ہے ’’ڈیئر ٹاٹا کمپنیز: جے آر ڈی ٹاٹا نے ایک بار ہوابازی انڈسٹری کے لیے پیمانہ طے کیا تھا۔ حکومت کے کنٹرول میں آنے سے پہلے انھوں نے ایئر انڈیا کو عالمی سطح پر قابل احترام برانڈ بنایا۔ اب جب آپ مالک کی شکل میں واپس آ گئے ہیں تو نچلی سطح پر کیوں ہیں؟ کیا کوئی کارپوریٹ انسپکشن نہیں ہے؟‘‘