پرنب مکھرجی کے اعزاز میں سات روزہ قومی سوگ کا اعلان

نئی دہلی: سابق صدر جمہوریہ پرنب مکھرجی کا آج انتقال ہوگیا ہے اور ان کے اعزاز میں آج سے ملک بھر میں سات روزہ قومی سوگ کا اعلان کیا گیا ہے۔ وزارت داخلہ نے ایک بیان جاری کرتے ہوئے کہا ہے کہ "حکومت گہرے دکھ کے ساتھ سابق صدر پرنب مکھرجی کے انتقال کا اعلان کرتی ہے۔ وہ آرمی کے ریسرچ اینڈ ریفرل اسپتال میں زیر علاج تھے۔ آج سے 6 ستمبر تک مرحوم کی روح کی شانتی کے لئے ملک بھر میں سات روزہ قومی سوگ رہے گا۔"

اس قومی سوگ کے دوران ملک بھر میں تمام عمارتوں پر قومی پرچم نصف جھکارہے گا اور سرکاری طور پر تفریحی پروگراموں کا کوئی اہتمام نہیں کیا جائے گا۔ پرنب مکھرجی کی آخری رسومات سرکاری اعزاز کے ساتھ ادا کی جائیں گی لیکن اس کی تاریخ ، وقت اور جگہ کا اعلان بعد میں کیا جائے گا۔

واضح رہے کہ سابق صدر جمہوریہ کو گزشتہ 10 اگست کو آر آر اسپتال میں داخل کرایا گیا تھا۔ اس کے دماغ میں خون کے جمنے کا پتہ چلا جس کے بعد اس کا آپریشن کیا گیا۔ بعد میں ان کے پھیپھڑوں میں انفیکشن اور گردے میں خرابی ہوگئی۔ اسپتال نے آج صبح جاری کردہ ایک بلیٹن میں کہا تھا کہ مسٹر مکھرجی کی حالت اتوار سے ہی خراب ہورہی ہے اور ان کے کچھ اعضاء نے کام کرنا چھوڑ دیا ہے۔ وہ پچھلے کئی دنوں سے بے ہوشی کی حالت میں تھے۔ انھیں مسلسل وینٹی لیٹر پر رکھا گیا تھا۔