وشاکھاپٹنم میں پھر گیس کا اخراج، 2 مزدور ہلاک، 4 اسپتال میں داخل

آندھرا پردیش کے وشاکھاپٹنم میں ایک مرتبہ پھر سے گیس کے اخراج کا واقعہ پیش آیا ہے۔ پیر کی شب ایک فارما کمپنی میں بنزیمیڈیزول گیس کے اخارج کے سبب 2 لوگوں کی موت ہو گئی ہے، جبکہ دیگر چار افراد کو اسپتال میں داخل کرایا گیا ہے۔ یہ واقعہ شہر کے پروادا علاقہ کے جواہر فارما سٹی میں واقع فارما کمپنی سینر لائف سائنسز پرائیویٹ لمیٹڈ میں پیش آیا۔

اطلاعات کے مطابق پیر اور منگل کی درمیانی شب ہونے والے حادثہ کے وقت کمپنی میں تقریباً 30 ملازمین کام کر رہے تھے۔ گیس اخراج کے بعد ان میں سے تقریباً 6 بیہوش ہو گئے، جنہیں اسپتال لے جایا گیا۔ بتایا جا رہا ہے کہ یہ واقعہ رات کے 11.30 بجے پیش آیا تھا لیکن اس بارے میں علی الصبح ہی معلوم چل سکا۔

ہلاک ہونے والے مزدوروں کی شناخت نریندر اور گوری شنکر کے طور پر ہوئی ہے، جبکہ دیگر چار کا علاج یہاں پر موجود کنگ جارج اسپتال میں چل رہا ہے۔ اسپتال میں داخل افراد میں سے ایک کی حالت نازک بتائی جا رہی ہے۔

مقامی انتظامیہ اور پولیس کے افسران نے جائے وقوعہ کا دورہ کیا اور ابتدائی تفتیش میں حادثہ کے پیچھے تکنیکی مسائل کو ذمہ دار قرار دیا جا رہا ہے۔ واقعہ کے بعد ریاست کے وزیر اعلیٰ جگن موہن ریڈی نے پوری معلومات حاصل کی ہے۔ معاملہ کی مزید تفتیش کی جا رہی ہے۔

واضح رہے کہ رواں سال وشاکھاپٹنم میں ہی واقعہ ایل جے کے پالیمر فیسلٹی میں اسٹائرین گیر کے اخراج کے سبب 12 افراد کی جان چلی گئی تھی جبکہ 500 سے زیادہ افراد کو اسپتال میں داخل کرنا پڑا تھا۔ اس معاملہ کی تفتیش کی جا رہی ہے۔