اننت ناگ تصادم، ایک عدم شناخت ملی ٹینٹ ہلاک، آپریشن جاری

سری نگر: جنوبی کشمیر کے ضلع اننت میں بجبہاڑہ کے کنڈی پورہ علاقے میں سیکورٹی فورسز اور ملی ٹنٹوں کے درمیان جاری تصادم میں ایک عدم شناخت ملی ٹنٹ ہلاک ہوا ہے۔ کشمیر زون پولیس نے اپنے آفیشل ٹوئٹر ہینڈل پر جمعرات کی صبح ایک ٹوئٹ میں اس آپریشن کے متعلق جانکاری فراہم کرتے ہوئے کہا کہ ’انت ناگ انکاؤنٹر اپ ڈیٹ: ایک عدم شناخت ملی ٹنٹ ہلاک، آپریشن جاری‘۔

بتادیں کہ سرکاری ذرائع کے مطابق ملی ٹنٹوں کے چھپنے کی مصدقہ اطلاع موصول ہونے پر سیکورٹی فورسز نے بجبہاڑہ کے کنڈی پورہ گاؤں کو بدھ کے روز محاصرے میں لے کر تلاشی آپریشن شروع کر دیا تھا۔ انہوں نے بتایا کہ تلاشی آپریشن کے دوران طرفین کے درمیان تصادم چھڑ گیا تھا جس کو بعد ازاں تاریکی کے پیش نظر معطل کر دیا گیا تھا۔ تاہم جمعرات کی صبح آپریشن کو بحال کر دیا گیا۔ دریں اثنا حکام نے احتیاطی طور پر ضلع میں موبائل انٹرنیٹ سہولیات معطل کر دی ہیں۔