تیل اور گیس کی بڑھتی قیمتوں کے درمیان مہاراشٹر حکومت نے سنائی خوشخبری

مہاراشٹر حکومت نے عوام کو بڑی راحت دینے کا اعلان کیا ہے۔ وزیر اعلیٰ ادھو ٹھاکرے کی قیادت والی مہاوکاس اگھاڑی اتحاد حکومت نے سی این جی پر ویٹ کی شرحوں میں بڑی تخفیف کرنے کا فیصلہ کیا ہے۔ شیوسینا، این سی پی اور کانگریس کی اتحاد والی اس حکومت نے ایسے حالات میں اس تخفیف کا فیصلہ کیا ہے جب تیل اور گیس کی قیمتوں میں لگاتار اضافہ دیکھنے کو مل رہا ہے۔

’بزنس ٹوڈے‘ کی ایک خبر کے مطابق مہاراشٹر حکومت نے ہفتہ کے روز ریاست میں کمپریس نیچرل گیس (سی این جی) پر ویٹ کی شرح گھٹانے کا نوٹیفکیشن جاری کر دیا ہے۔ اس کے مطابق یکم اپریل سے ریاست میں سی این جی پر 13.5 فیصد کی جگہ محض 3 فیصد ویٹ دینا ہوگا۔ سی این جی کی نئی شرحیں یکم اپریل سے نافذ ہو جائیں گی اور گاہکوں کو سی این جی کے لیے کم قیمتیں دینی ہوں گی۔

مہاراشٹر کے وزیر مالیات اجیت پوار نے اس مہینے کے شروع میں بجٹ اجلاس کے دوران ویٹ کی شرح گھٹانے کی تجویز رکھی تھی۔ اب حکومت نے اس کا نوٹیفکیشن بھی جاری کر دیا ہے۔ حکومت کے اس قدم سے خزانہ میں سالانہ 800 کروڑ روپے کم آئیں گے۔ پوار نے ہفتہ کو مراٹھی میں ایک ٹوئٹ کر کے اس نوٹیفکیشن کے جاری ہونے کی خبر دی۔

واضح رہے کہ پٹرول اور ڈیزل کے مقابلے سی این جی کی قیمت پہلے سے ہی کم ہے۔ گاڑیوں میں یہ بہتر مائلیج بھی دیتی ہے۔ ایسے میں اس کی قیمت کم ہونے سے کار چلانے والوں کے ساتھ ساتھ آٹو رکشہ ڈرائیورس، ٹیکسی ڈرائیورس اور کیب چلانے والوں کو فائدہ ہوگا۔ اس گیس کو پائپڈ نیچرل گیس کے طور پر گھروں میں رسوئی گیس کے طور پر بھی سپلائی کیا جاتا ہے۔ اس طرح دیکھا جائے تو گھریلو خواتین کا بوجھ بھی ہلکا ہوگا۔