امریکہ کی دہشت گردی پر کارروائی! کالعدم القاعدہ برصغیر اور ٹی ٹی پی کے رہنماؤں کو دہشت گرد قرار دیا

واشنگٹن: امریکہ نے عالمی دہشت گردی سے مقابلہ کے لئے اہم کارروائی کرتے ہوئے اے کیو آئی ایس (القاعدہ برصغیر)، ٹی ٹی پی (تحریک طالبان پاکستان) کے لیڈران کو عالمی دہشت گرد قرار دیا ہے۔

امریکہ نے کالعدم القاعدہ برصغیر اور تحریک طالبان پاکستان کے 4 رہنماؤں کو عالمی دہشت گرد قرار دے دیا۔ امریکی وزات خارجہ کی جانب سے جاری کردہ بیان میں کالعدم القاعدہ برصغیر کے امیر اسامہ محمود اور نائب امیر عاطف یحیٰ کو دہشت گرد قرار دیا گیا ہے۔

امریکی وزارت خارجہ کی جانب سے کالعدم القاعدہ برصغیر کی بھرتیوں کے معاملات دیکھنے والے محمد معروف کو بھی دہشت گرد قرار دیا گیا ہے۔ کالعدم تحریک طالبان پاکستان کے قاری امجد کو بھی امریکی وزارت خارجہ نے دہشت گرد قرار دے دیا ہے۔ امریکی محکمہ خارجہ کا کہنا ہے کہ قاری امجد خیبر پختونخوا میں آپریشنز اور عسکریت پسندوں کا سرغنہ ہے۔

اس حوالے سے امریکی وزیر خارجہ انٹونی بلنکن نے کہا ہے کہ امریکہ افغانستان میں سرگرم دہشت گرد گروپوں کی طرف سے لاحق خطرات کا مقابلہ کرنے کے لئے پُرعزم ہے۔ انٹونی بلنکن نے کہا کہ اس بات کو یقینی بنانا ہوگا کہ افغانستان دہشت گردوں کی آماج گاہ نہ بنے۔