اپنے دائرے میں رہے القاعدہ، ہندوستان کا رخ کیا تو مٹا دیا جائے گا: وزیر داخلہ ایم پی نروتم مشرا

بھوپال: توہین رسول کے معاملہ پر جاری ہنگامہ آرائی کے درمیان القاعدہ نے ہندوستان میں خودکش حملے کرنے کی دھمکی دی ہے۔ القاعدہ کی اس دھمکی پر رد عمل ظاہر کرتے ہوئے مدھیہ پردیش کے وزیر داخلہ نروتم مشرا نے بدھ کے روز کہا کہ ہندوستان پر حملہ کرنے کی سوچ رکھنے والوں کو یہ معلوم ہونا چاہئے کہ انہیں مٹا دیا جائے گا!

القاعدہ کی جانب سے بی جے پی کی سابق ترجمان نوپور شرما کے پیغمبر اسلام پر کئے گئے توہین آمیز تبصرہ سے پیدا ہونے والے تنازعہ کے درمیان یہ دھمکی دی گئی ہے۔ مشرا نے کہا کہ ہندوستان میں کسی بھی دہشت گرد تنظیم کو برداشت نہیں کیا جائے گا۔

نروتم مشرا نے اندور میں صحافیوں سے گفتگو کرتے ہوئے کہا، ’’وزیر اعظم نریندر مودی کی قیادت میں ملک محفوظ ہے۔ ہندوستان پر حملہ کرنے کی سوچ رکھنے والوں کو معلوم ہونا چاہئے کہ انہیں مٹا دیا جائے گا۔‘‘ وزیر نے کہا، ’’القاعدہ کو اپنے دائرے میں رہنا چاہئے۔ اگر وہ ہندوستان پر حملہ کرنے کے بارے میں سوچ رہا ہے تو اسے ختم کر دیا جائے گا۔‘‘

خیال رہے کہ القاعدہ کی جانب سے جاری کردہ ایک خط میں کہا گیا ہے کہ وہ اپنے پیغمبر کی حرمت کے لئے دہلی، ممبئی، اتر پردیش اور گجرات میں خودکش حملے کرنے کے لئے تیار ہیں۔ خط کے آخر میں کہا گیا ہے کہ ’بھگوا دہشت گردوں‘ کو اپنے مٹنے کا انتظار کرنا چاہئے۔ خط میں کیا گیا کہ نہ اپنے گھروں میں اور نہ ہی قلع بند فوجی چھاونیوں میں پناہ ملے گی۔

خط میں مزید کہا گیا کہ مسلمانوں کے دلوں میں خون بہہ رہا ہے اور وہ انتقام کے جذبہ سے بھرے ہوئے ہیں۔ یہ تنازعہ بی جے پی کی ترجمان نوپور شرما کے پیغمبر اسلام پر کئے گئے تبصرہ سے شروع ہوا تھا، نوپور کو اب عہدے اور پارٹی سے معطل کیا جا چکا ہے۔