اخلاق قتل معاملہ: عینی شاہد بیٹی اور دیگر گواہان کے بیان عدالت میں آج قلمبند ہوں گے

دادری: گھر میں گائے کا گوشت رکھنے کے الزام میں عید الاضحیٰ کے موقع پر پیٹ پیٹ کر موت کے گھاٹ اتارے گئے محمد اخلاق خان کے معاملہ میں فیصلہ جلد آنے کی امید ہے۔ اس معاملے میں گوتم بدھ نگر ضلع عدالت میں 12 ملزمان کے خلاف فرد جرم دائر کی جا چکی ہے۔ آج اس قتل کیس کی گواہ اور مقتول اخلاق کی بیٹی شائستہ ضلعی عدالت میں اپنا بیان ریکارڈ کرائے گی۔

’آج تک‘ کی رپورٹ کے مطابق سخت حفاظتی انتظامات کے درمیان گوتم بدھ نگر پولیس شائستہ کو بیان ریکارڈ کرانے کے لئے آج اس کی سسرال سے عدالت لے کر جائے گی۔ محمد اخلاق کو 28 ستمبر 2015 کو موب لنچنگ کر کے قتل کیا گیا تھا اور یہ معاملہ ملک اور بیرونی میڈیا میں شہ سرخیوں میں چھا گیا تھا۔

چھ سال پرانے اس مقدمے کی سماعت گوتم بدھ نگر ضلع عدالت کی فاسٹ ٹریک کورٹ میں کی جا رہی ہے۔ گزشتہ 4 سالوں میں ملزمان کے خلاف الزامات عائد کیے گئے۔ اس معاملے میں 19 افراد کے خلاف ایف آئی آر درج کی گئی تھی۔ معاملہ کے دو ملزمان پہلے ہی دم توڑ چکے ہیں۔

اس معاملے میں نوئیڈا پولیس نے 24 دسمبر 2015 کو 15 ملزمان کے خلاف چارج شیٹ دائر کی تھی۔ 31 جولائی 2017 کو کلیدی ملزم وشال رانا کو الہ آباد ہائی کورٹ نے ضمانت دے دی۔ 12 فروری 2021 کو ضلع عدالت نے تمام 12 ملزمان کے خلاف الزامات عائد کر دیئے۔

اب 22 مارچ کو بساہڑہ گاؤں ایک مرتبہ پھر اس وقت سرخیوں میں آیا جب یہاں بی جے پی کے لیڈران کی سخت مخالفت کی گئی۔ دراصل، بی جے پی کے مغربی اتر پردیش کے صدر موہت بینی وال کو گریٹر نوئیڈا کے گاؤں بساہڑہ میں ایک اجلاس سے خطاب کرنا تھا لیکن جب موہت بینی وال گائوں پہنچے تو لوگوں نے ان کے خلاف نعرے بازی شروع کر دی۔