اجیت پوار نے کی چچا شرد پوار کی تعریف، کیا اشارہ ہے؟

ممبئی: نیشنلسٹ کانگریس پارٹی (این سی پی) کے سربراہ اور مہاراشٹر کے نائب وزیر اعلیٰ اجیت پوار نے پیر کو پارٹی کے یوم تاسیس کے موقع پر اپنے چچا شرد پوار کا 1999 میں پارٹی کے قیام سے لے کر اب تک پارٹی کو آگے لے جانے میں تعاون کے لیے شکریہ ادا کیا۔ اجیت پوار کا یہ بیان ایسے وقت میں آیا ہے جب حال ہی میں ختم ہوئے لوک سبھا انتخابات میں این سی پی کی کارکردگی مایوس کن رہی۔

دریں اثنا، ممبئی میں ایک پارٹی تقریب سے خطاب کرتے ہوئے، اجیت پوار نے این سی پی کے اس موقف کو دہرایا کہ وہ نریندر مودی حکومت میں کابینہ وزیر کے عہدے سے کم کسی چیز پر تصفیہ نہیں کریں گے۔ تاہم، انہوں نے کہا، ’’ہم اب بھی این ڈی اے کا حصہ ہیں۔‘‘

اجیت پوار نے مزید کہا، "میں شرد پوار جی کا شکریہ ادا کرنا چاہتا ہوں جنہوں نے گزشتہ 24 سالوں سے پارٹی کی قیادت کی، ساتھ ہی ان تمام لوگوں کا بھی شکریہ ادا کرنا چاہتا ہوں جو پارٹی کے آغاز سے ہی اس کے ساتھ رہے ہیں۔‘‘

شرد پوار نیشنلسٹ کانگریس پارٹی کے بانی ہیں۔ جولائی 2023 میں، اجیت پوار اور کچھ دوسرے رہنما پارٹی کے خلاف بغاوت کرنے کے بعد مہاراشٹر میں شیوسینا-بی جے پی حکومت میں شامل ہوئے۔

حال ہی میں شرد پوار دھڑے کی این سی پی نے اجیت پوار ڈھڑے کی این سی پی کو عہدہ وزارت نہ دئے جانے پر طنز کیا تھا۔ این سی پی (ایس پی) کے لیڈر روہت پوار نے کہا تھا، “اجیت دادا کی طاقت کم کر دی گئی ہے۔ بی جے پی یہ پیغام دینا چاہتی ہے کہ ہمیں آپ سے کوئی فائدہ نہیں ہوا۔ اجیت دادا کو آگے چل کر بی جے پی کے نشان پر لڑنا پڑے گا۔ دادا سے سب سے زیادہ فائدہ پرفل پٹیل کو ہوا ہے۔ ای ڈی کی تحقیقات بھی بند ہو گئی اور راجیہ سبھا (رکنیت) بھی مل گئی۔‘‘

قابل ذکر ہے کہ مہاراشٹر کے اس الیکشن میں مہایوتی کو کافی نقصان اٹھانا پڑا ہے۔ اس اتحاد میں شامل بی جے پی کو 9 سیٹیں ملی ہیں۔ جبکہ ایکناتھ شندے دھڑے کی شیو سینا کو 7 اور اجیت پوار دھڑے کی این سی پی کو صرف ایک سیٹ ملی ہے۔ وہیں کانگریس کی قیادت والی مہاوکاس اگھاڑی نے انتخابات میں 30 سیٹیں جیتی ہیں۔