اجیت پوار نے بی جے پی میں جانے کی افواہوں پر لگائی لگام، شرد پوار کے ساتھ دعوتِ افطار میں شرکت

ممبئی: این سی پی کے لیڈر اجیت پوار نے گزشتہ روز ان افواہوں اور قیاس آرائیوں پر لگام لگا دی جن میں کہا جا رہا تھا کہ وہ این سی پی کے ارکان اسمبلی کے ساتھ بی جے پی میں شامل ہو سکتے ہیں۔ اجیت پوار نے اپنے بیان میں کہا کہ وہ جب تک حیات ہیں اپنی پارٹی کے لیے کام کرتے رہیں گے۔ صرف اتنا ہی نہیں شرد پوار اس کے بعد پارٹی سربراہ اور اپنے چچا شرد پوار کے ساتھ اسلام جمخانہ میں منعقدہ دعوت افطار میں بھی شامل ہوئے۔

ممبئی کے اسلام جمخانہ میں منگل کی شام کو این سی پی کی جانب سے دعوت افطار کا اہتمام کیا گیا۔ اجیت پوار اور شرد پوار کے علاوہ افطار میں سپریہ سولے، دلیپ ولسے پاٹل اور جتیندر اوہاڑ سمیت متعدد لیڈران نے بھی شرکت کی۔

اجیت پوار نے ان افواہوں کی بھی تردید کی کہ انہوں نے این سی پی کے 53 میں سے 40 ارکان اسمبلی کے دستخط کرا لیے ہیں۔ انہوں نے کہا کہ اس طرح کی خبریں پارٹی کارکنان کی دل آزاری کرتی ہین اور اس سے غیر یقینی ماحول پیدا ہوتا ہے۔ انہوں نے کہا کہ ہم سبھی (پارٹی کے ارکان اسمبلی) این سی پی کے ساتھ ہیں۔

این سی پی کے سربراہ شرد پوار نے اپنے بھتیجے اجیت پوار کے بارے میں قیاس آرائیوں کو مسترد کرتے ہوئے کہا کہ کسی نے پارٹی قانون سازوں کی میٹنگ نہیں بلائی ہے۔ انہوں نے کہا کہ اجیت پوار پارٹی کے کام میں مصروف ہیں اور میڈیا کو اس معاملے کو طول دینے کی ضرورت نہیں ہے۔ شرد پوار نے کہا کہ ’’میں این سی پی اور اپنے تمام ساتھیوں کے بارے میں یہ کہہ سکتا ہوں کہ ہمارے پاس صرف ایک خیال ہے کہ پارٹی کو کیسے مضبوط کیا جائے اور اس کے علاوہ کسی کے ذہن میں کوئی خیال نہیں ہے۔‘‘

دریں اثنا، ایکناتھ شندے دھڑے کے ترجمان نریش مہاسکے نے کہا کہ اگر اجیت دادا این سی پی سے کچھ لوگوں کو لاتے ہیں تو ان کا استقبال ہے۔ مہاراشٹر حکومت کے وزیر ادے ساونت نے بھی کہا کہ اجیت پوار کا استقبال ہے۔ انہوں نے کہا کہ اجیت پوار کو بہتر تجربہ ہے، وہ ایک بڑے لیڈر ہیں اور ہم نے ان کے ساتھ کام کیا ہے۔

وہیں، ادھو ٹھاکرے دھڑے کے رہنما اور راجیہ سبھا کے رکن سنجے راوت نے کہا کہ اجیت پوار کی طرف سے دی گئی وضاحت بہت اہم ہے۔ جس طرح سے یہاں کے کچھ لوگ، پارٹیاں، خاص طور پر بی جے پی، ماحول کو خراب کرنے کی کوشش کر رہے تھے، یا مرکزی تفتیشی ایجنسی کا استعمال کر کے شیوسینا، این سی پی یا کانگریس میں پھوٹ پیدا کرنے کی کوشش کر رہے تھے، آج اجیت پوار نے جواب دیا ہے۔ اجیت پوار اپنی آخری سانس تک مہاوکاس اگھاڑی کے رکن رہیں گے۔