اجیت ڈوول کا دورہ کشمیر، سیکورٹی صورتحال کا جائزہ لیا

سری نگر: قومی سلامتی کے مشیر اجیت ڈوول نے جمعرات کے روز یہاں ایک اعلیٰ سطحی میٹنگ میں وادی کشمیر کی سیکورٹی صورتحال کا جائزہ لیا۔ سرکاری ذرائع نے یو این آئی کو بتایا کہ اجیت ڈوول جمعرات کی صبح سری نگر پہنچے جہاں انہوں نے ایک اعلیٰ سطحی میٹنگ میں وادی کشمیر اور لائن آف کنٹرول کی سیکورٹی صورتحال کا جائزہ لیا۔

انہوں نے کہا کہ اجیت ڈوول نے وادی کی تمام اہم فوجی تنصیبات بشمول سری نگر کے ایئر بیس کی سیکورٹی صورتحال کا جائزہ لیا۔ علاوہ ازیں کسی بھی تخریبی کارروائی کو ناکام بنانے کے لئے فوج کی طرف سے کی گئی تیاریوں کا بھی جائزہ لیا'۔

قومی سلامتی کے مشیر نے وادی کشمیر کا دورہ وزیر اعظم نریندر مودی کے اقوام متحدہ کی جنرل اسمبلی سے خطاب کے محض ایک روز قبل کیا ہے۔ قبل ازیں اجیت ڈوال نے اگست کے اوائل میں وادی کشمیر کا گیارہ روزہ دورہ کیا جس دوران انہوں نے جنوبی کشمیر اور ڈاؤن ٹاون سری نگر میں سیکورٹی فورسز کے اہلکاروں سے ملاقات کی۔ تاہم 5 اگست کے بعد یہ اجیت ڈوول کا تیسرا دورہ کشمیر ہے۔

قابل ذکر ہے کہ مرکزی حکومت نے 5 اگست کو ریاست کو خصوصی پوزیشن عطا کرنے والی آئین ہند کی دفعہ 370 اور دفعہ 35 اے ہٹا دی اور ریاست کو دو حصوں میں تقسیم کرکے مرکز کے زیر انتظام والے علاقے بنانے کا اعلان کیا۔ وادی کشمیر میں تب سے لیکر اب تک ہڑتال اور مواصلاتی خدمات پر پابندی عائد ہے جس کی وجہ سے معمول کی زندگی معطل ہے۔