امیدواروں کے کاؤنٹنگ ایجنٹ کو بیٹھنے کی اجازت نہ دینا سب سے بڑی دھاندلی : ماکن

کانگریس کے سینئر رہنما  اور پارٹی کے خزانچی اجے ماکن نے کہا ہے کہ بتایا جا رہا ہے کہ ووٹوں کی گنتی میں اس بار اسسٹنٹ الیکشن آفیسر یعنی اے آر او کی میز  کے سامنے امیدواروں کے کاؤنٹنگ ایجنٹوں کو بیٹھنے کی اجازت نہیں دی جا رہی ہے اور اگر یہ سچ ہے تو یہ اس الیکشن کی یہ سب سے بڑی دھاندلی ہے۔

انہوں نے کہا کہ وہ کئی بار لوک سبھا اور اسمبلی الیکشن لڑ چکے ہیں۔ امیدواروں کے کاؤنٹنگ ایجنٹس ہر وقت اے آر او کے سامنے موجود ہوتے ہیں۔ انہیں امید ہے کہ الیکشن کمیشن اس طرف توجہ دے گا اور اس نظام کو برقرار رکھے گا۔

اجے ماکن نے کہا کہ اے آر او کی میز پر ’امیدواروں  کے کاؤنٹنگ ایجنٹوں‘ کو پہلی بار اجازت نہیں دی جارہی ہے۔ میں پہلے ہی 9 لوک سبھا اور اسمبلی انتخابات لڑ چکا ہوں اور یہ پہلی بار ہو رہا ہے۔

انہوں نے کہا ’’اگر یہ سچ ہے تو یہ مبینہ الیکٹرانک ووٹنگ مشین یعنی ای وی ایم  کی دھاندلی سے بڑا معاملہ ہے۔ میں یہ معاملے کو تمام امیدواروں کے نوٹس میں لا رہا ہوں۔ مجھے امید ہے کہ الیکشن کمیشن جلد ہی اس میں اصلاح کرے گا۔