ایئر انڈیا کے خلاف ڈی جی سی اے نے کی سخت کارروائی، 10 لاکھ روپے کا جرمانہ عائد

ملک کے ہوابازی ریگولیٹری ڈی جی سی اے نے مسافر مرکوز اصولوں پر عمل نہیں کرنے کے لیے ٹاٹا گروپ کی طیارہ سروس کمپنی ایئر انڈیا پر 10 لاکھ روپے کا جرمانہ عائد کیا ہے۔ ڈی جی سی اے نے 3 نومبر کو ایئر انڈیا کو ایک وجہ بتاؤ نوٹس جاری کیا تھا جس میں مختلف الزامات پر اس کا رد عمل مانگا گیا تھا۔

ڈی جی سی اے کا کہنا ہے کہ اس نے اصولوں میں مقررہ التزامات کے مطابق سبھی درج فہرست طیارہ سروس کمنیوں کے ذریعہ مسافروں کو فراہم کی جانے والی سہولیات/معاوضے سے متعلق ذمہ داریوں کی تکمیل کا پتہ لگانے کے لیے مئی اور ستمبر میں دہلی، کوچی اور بنگلورو ہوائی اڈوں پر جائزہ لیا۔ ڈی جی سی اے کے ایک سینئر افسر نے کہا کہ ’’ایئرلائنز کے تجزیہ کے دوران یہ پایا گیا کہ ایئر انڈیا ضروری شہری ہوابازی ضروریات (سی اے آر) کے التزامات پر عمل نہیں کر رہا تھا۔ اس کو پیش نظر رکھتے ہوئے 3 نومبر کو ایئر انڈیا کو ایک وجہ بتاؤ نوٹس جاری کیا گیا تھا جس میں اس کا رد عمل مانگا گیا تھا۔ ایئر انڈیا کے ذریعہ دیے گئے جواب کے بعد یہ پایا گیا کہ اس نے سی اے آر کے التزامات پر عمل نہیں کیا ہے۔‘‘

ڈی جی سی اے کے مطابق دیگر باتوں کے علاوہ زیر التوا پروازوں سے متاثرہ مسافروں کے لیے ہوٹل رہائش فراہم نہیں کرنا، ان کے کچھ گراؤنڈ اہلکاروں کو تربیت نہیں دینا، سی اے آر میں مقررہ شرائط اور خراب سیٹوں پر سفر کرنے کے لیے مجبور کرنے کے بعد بین الاقوامی بزنس کلاس کے مسافروں کو معاوضے کی ادائیگی نہ کرنا شامل ہے۔ افسر نے کہا کہ ’’ڈی جی سی اے نے اصولوں پر عمل نہ کرنے پر ایئر انڈیا پر 10 لاکھ روپے کا مالی جرمانہ عائد کیا ہے۔‘‘