فضائیہ کا طیارہ جیسلمیر کے پاس حادثہ کا شکار، سنسان علاقے میں دور تک پھیلا ملبہ، دیکھنے والوں کی لگی بھیڑ

راجستھان کے جیسلمیر واقع پتھلا گاؤں کے قریب ہندوستانی فضائیہ کا ایک طیارہ حادثہ کا شکار ہو گیا ہے۔ یہ طیارہ حادثہ کے بعد ایک سنسان علاقہ میں گرا ہے جہاں دور دور تک اس کا ملبہ پھیلا ہوا دکھائی دے رہا ہے۔ اس حادثہ میں کسی ہلاکت کی خبر اب تک سامنے نہیں آئی ہے۔ ایسا لگ رہا ہے جیسے یہ طیارہ بغیر پائلٹ کے اڑ رہا تھا۔ حالانکہ یہ جانچ کا موضوع ہے کہ طیارہ کا استعمال کون کر رہا تھا اور کیا یہ بے قابو ہو کر حادثہ کا شکار ہوا۔

خبر رساں ایجنسی آئی اے این ایس نے اس حادثہ سے متعلق اپنی ایک رپورٹ میں بتایا ہے کہ حادثہ کا شکار ہونے کے بعد طیارہ نے آگ پکڑ لی اور پھر سنسان علاقہ میں گر کر اس کا ملبہ دور دور تک پھیل گیا۔ ملبہ کو دیکھنے کے لیے دیہی عوام کی بھیڑ جمع ہو گئی ہے۔ اس طیارہ میں کسی پائلٹ کے ہونے کی جانکاری نہیں ملی ہے اور اندیشہ ظاہر کیا جا رہا ہے کہ یہ کوئی جاسوسی طیارہ ہوگا۔

اس حادثہ کے اسباب کا اب تک پتہ نہیں چل سکا ہے۔ فضائیہ اور پولیس کے افسران جائے حادثہ پر موجود ہیں اور حالات کا جائزہ لے رہے ہیں۔ امکان ظاہر کیا جا رہا ہے کہ کسی تکنیکی خامی کے سبب یہ طیارہ حادثہ کا شکار ہوا ہے۔ اس معاملے میں جانچ شروع ہو گئی ہے اور امید کی جا رہی ہے کہ جلد ہی حادثہ کی وجہ سامنے آ جائے گی۔