کشمیر کے لیے ہوائی سفر کرنا ہوا محال، کرایہ میں اچانک اضافہ سے لوگ پریشان

سری نگر: وادی کشمیر میں جاری نامساعد حالات کے بیچ جہاں سری نگر سے جموں کے زمینی سفر کرایہ میں اضافہ ہوا ہے تو وہیں ہوائی کرایہ میں بھی اضافہ ہونے سے ہوائی سفر اب عام لوگوں کے بس کی بات نہیں رہی ہے۔ سری نگر سے نئی دہلی ہوائی سفر کرنے والے مسافروں نے سری نگر سے دہلی ہوائی کرایہ میں یکایک اضافہ ہونے پر اظہار مایوسی کرتے ہوئے متعلقہ حکام سے مداخلت کی اپیل کی ہے تاکہ لوگوں خاص کر طلبا اور بیماروں کو لاحق پریشانیوں کا ازالہ کیا جاسکے۔

وسیم احمد نامی ایک شہری جس کو بغرض تجارت دلی جانا تھا، نے یو این آئی اردو کے ساتھ بات کرتے ہوئے کہا کہ ہوائی کرایے میں اچانک ہوئے بے تحاشا اضافے سے کئی لوگوں نے اپنے طے شدہ پروگرام ہی معطل کردئیے ہیں۔ انہوں نے کہا کہ 'آج سے دو ہفتے قبل دلی کے لئے ہوائی ٹکٹ زیادہ زیادہ دو ہزارروپے میں ملتی تھی لیکن آج یہی ٹکٹ کم سے کم چار ہزار روپے میں ملتی ہے جس کی وجہ سے کئی لوگوں نے دلی جانے کا پروگرام ہی ملتوی کیا، مجھے خود بھی تجارت کے سلسلے میں دلی جانا تھا لیکن ہوائی کرایہ میں ہوئے بے تحاشا اضافے کے باعث میں نے بھی فی الوقت پروگرام موخر کیا'۔ انہوں نے مزید کہا کہ اگر ایک ہفتہ پہلے نئی دہلی تک کے لئے ہوائی ٹکٹ نکالیں گے تو تب بھی کم سے کم چار ہزار روپے میں ٹکٹ ملتا ہے اور اگر مجبوری کے عالم میں ہوائی ٹکٹ نکالنا پڑے تو چھ ہزار روپے سے کم ٹکٹ کا ملنا ناممکن ہے۔

ارشاد احمد نامی ایک شہری نے کہا کہ یہاں انٹرنیٹ کی عدم دستیابی کے باعث ہوائی ٹکٹ نکلانا بھی ایک مشکل معاملہ ہے۔ انہوں نے کہا کہ 'انٹرنیٹ کی معطلی کے باعث یہاں ہوائی ٹکٹ نکالنا بھی بہت ہی مشکل کام ہے کیونکہ جب یہاں انتطامیہ کی طرف سے قائم این آئی سی سنٹروں میں جاتے ہیں تو ایس ایم ایس سروس پر عائد پابندی کی وجہ سے موبائیل فونوں پر او ٹی پی نمبر نہیں آتا ہے جس کی وجہ سے ٹکٹ نہیں نکلتا ہے'۔

موصوف شہری نے کہا کہ اب یہاں لوگوں کو ہوائی ٹکٹ نکالنے کے لئے ٹی آر سی جانا پڑتا ہے جو موجودہ حالات میں بہت ہی کٹھن کام ہے۔ ان کا کہنا ہے کہ 'ہوائی ٹکٹ نکالنے کے لئے لوگوں کو ٹی آر سی جانا پڑتا ہے جو ہر کسی کے بس کی بات نہیں ہے خاص کر دور افتادہ علاقوں کے رہنے والوں کے لئے موجودہ حالات کے چلتے یہ ناممکن بات ہے'۔

ادھر ذرائع نے مطابق سری نگر کے ہوائی اڈے پر پروازوں کی تعداد میں کمی کی گئی جو ہوائی کرایے میں اضافے کا باعث بن گئی۔ انہوں نے کہا کہ چند ہفتے قبل سری نگر کے بین الاقوامی ہوائی اڈے پر پروازوں کی تعداد میں کمی کی گئی جس سے ہوائی کرایے میں اضافہ ہوا کیونکہ جب ڈیمانڈ بڑھ گئی تو ظاہر ہے کہ کرایہ میں اضافہ ہوجاتا ہے۔

ذرائع کے مطابق سری نگر ہوائی اڈے پر شام کی پروازوں کو بھی معطل کیا گیا ہے۔ انہوں نے بتایا کہ مسافروں کی تعداد میں کمی واقع ہونے کے پیش نظر شام کی پروازوں کی معطل کیا گیا ہے۔ قابل ذکر ہے کہ وادی کشمیر میں گزشتہ کم وبیش تین ماہ سے غیر اعلانیہ ہڑتالوں کا سلسلہ جاری ہے جس کے باعث بیرون ریاست کے سیاح اور دیگر لوگ وادی کا رخ نہیں کررہے ہیں۔