تروپتی کے بعد سدھی ونایک مندر کے ’پرساد‘ پر اٹھے سوال، بھکتوں کو ملے چوہے کے بچے!

تروپتی کے لڈو ’پرسادم‘ کو لے کر جاری تنازعہ کے درمیان سدھی ونایک مندر کے پرساد کے پیکٹ میں چوہے ہونے کی ایک مبینہ ویڈیو سوشل میڈیا پر دیکھنے کو مل رہی ہے۔ حالانکہ سدھی ونایک گنپتی مندر نیاس (ایس ایس جی ٹی) نے اس طرح کے الزام کو مسترد کر دیا ہے اور کہا ہے کہ اس نے معاملے کی جانچ شروع کر دی ہے۔

شیوسینا لیڈر اور ایس ایس جی ٹی چیف سدا سرونکر نے منگل کے روز خبر رساں ایجنسی پی ٹی آئی سے کہا کہ ’’روزانہ لاکھوں لڈو تقسیم کیے جاتے ہیں اور جس جگہ پر وہ بنائے جاتے ہیں، وہ صاف ستھرا ہے۔ ویڈیو میں ایک گندی جگہ دکھائی دے رہی ہے۔ میں دیکھ سکتا ہوں کہ یہ مندر کا حصہ نہیں ہے اور ویڈیو کہیں باہر بنایا گیا ہے۔‘‘

مبینہ ویڈیو میں نیلے رنگ کی ایک ’ٹرے‘ میں رکھے لڈو کے پیکٹ چوہوں کے ذریعہ کترے ہوئے دکھائی دے رہے ہیں۔ سرونکر کا اس تعلق سے کہنا ہے کہ ’’ہم سی سی ٹی وی فوٹیج کھنگالیں گے اور جانچ کے لیے ایک ڈی سی پی (ڈپٹی پولیس کمشنر) رینک کے افسر کو مقرر کیا جائے گا۔ قصوروار کے خلاف کارروائی کی جائے گی۔‘‘

اس سے قبل پریس کانفرنس میں سرونکر نے کہا کہ مندر یہ یقینی کرنے کے لیے ہر ممکن کوشش کرتا ہے کہ پرساد صاف جگہ پر تیار کیا جائے۔ انھوں نے مزید کہا کہ ’’گھی، کاجو اور دیگر اشیا پہلے جانچ کے لیے بی ایم سی کے تجربہ گاہ میں بھیجا جاتا ہے اور وہاں سے منظوری کے بعد استعمال کیا جاتا ہے۔‘‘ انھوں نے بتایا کہ پانی کی بھی جانچ تجربہ گاہ میں کرائی جاتی ہے۔ اس کا مطلب ہے کہ ہم یہ یقینی کرنے پر پوری توجہ دیتے ہیں کہ عقیدتمندوں کو دیا جانے والا پرساد صاف ہو۔