’مرکز میں نئی حکومت آنے کے بعد جموں و کشمیر میں 14 دہشت گردانہ حملہ ہوئے‘، پرینکا گاندھی جوانوں کی شہادت پر فکر مند

کانگریس جنرل سکریٹری پرینکا گاندھی نے جموں و کشمیر میں دہشت گردانہ حملہ کے دوران تصادم میں ایک جوان کی شہادت پر فکر مندی کا اظہار کیا ہے۔ انھوں نے اس تصادم میں ایک جوان کی شہادت اور 4 جوانوں کے زخمی ہونے کی خبر پر فکر ظاہر کرتے ہوئے دعویٰ کیا کہ مرکز میں نئی حکومت بننے کے بعد سے اس مرکز کے زیر انتظام خطہ میں 14 دہشت گردانہ حملے ہو چکے ہیں۔

دراصل فوج نے جموں و کشمیر کے کپواڑہ ضلع کے کمکاری سیکٹر میں ہفتہ کے روز پاکستان کی ’بارڈر ایکشن ٹیم‘ (بی اے ٹی) کے حملے کو ناکام کر دیا۔ اس دوران ہوئے تصادم میں فوج کا ایک جوان شہید ہو گیا، جبکہ ایک کیپٹن سمیت چار دیگر فوجی اہلکار زخمی ہو گئے جن کا علاج اسپتال میں جاری ہے۔

اس واقعہ کے تعلق سے پرینکا گاندھی نے سوشل میڈیا پلیٹ فارم ’ایکس‘ پر ایک پوسٹ کیا ہے جس میں لکھا ہے کہ ’’جموں و کشمیر میں دہشت گردوں کے ساتھ ہوئے تصادم میں ایک جوان کے شہید اور 4 جوانوں کے زخمی ہونے کی خبر انتہائی افسوسناک ہے۔ ایشور مرنے والے کی روح کو سکون بخشے۔ غمزدہ اہل خانہ کے تئیں میری ہمدردی۔ زخمی جوانوں کے جلد صحت یاب ہونے کی دعا کرتی ہوں۔‘‘

اس پوسٹ میں پرینکا گاندھی نے آگے لکھا ہے کہ ’’مرکز میں نئی حکومت بننے کے بعد جو دہشت گردانہ حملے ہوئے ہیں، ان میں 15 جوانوں کی شہادت ہوئی ہے جو ملک کے فکر کی بات ہے۔ دہشت گردی کے خلاف سخت اور نتیجہ خیز قدم اٹھانے کی ضرورت ہے۔‘‘