انتخابات کے بعد وزیر اعظم نے پہلی بار ریڈیو پروگرام ’من کی بات‘ سے خطاب، اولمپکس سے لے کر ماں تک کو یاد کیا

نئی دہلی: این ڈی اے کے تحت لوک سبھا انتخابات جیتنے اور تیسری بار وزیر اعظم کے طور پر حلف لینے کے بعد پی ایم مودی نے پہلی بار اپنے ریڈیو پروگرام ’من کی بات‘ کے ذریعے عوام سے خطاب کیا۔ ضابطہ اخلاق کے نفاذ کے بعد پی ایم مودی نے چار ماہ بعد اس پروگرام کا اہتمام کیا۔

وزیراعظم نے کہا، ’’آج وہ دن آ گیا ہے جس کا ہم سب فروری سے انتظار کر رہے تھے۔ میں ایک بار پھر ’من کی بات‘ کے ذریعے آپ اور اپنے خاندان کے افراد کے درمیان آیا ہوں۔ ایک بہت ہی پیاری کہاوت ہے ’اتی وداع پونرملنائے'، اس کا مطلب بھی اتنا ہی پیارا ہے، میں رخصت لیتا ہوں، دوبارہ ملنے کے لیے۔ اسی جذبے کے تحت میں نے فروری میں آپ سے کہا تھا کہ انتخابی نتائج کے بعد میں آپ سے دوبارہ ملوں گا اور آج 'من کی بات' کے ساتھ میں آپ کے درمیان دوبارہ حاضر ہوں۔‘‘

وزیر اعظم مودی نے کہا کہ بہت ساری ہندوستانی مصنوعات ہیں جن کی پوری دنیا میں بہت مانگ ہے اور جب ہم کسی مقامی ہندوستانی پروڈکٹ کو عالمی سطح پر جاتے دیکھتے ہیں تو فخر سے بھر جانا فطری بات ہے۔ ایسی ہی ایک پروڈکٹ ’اراکو کافی‘ ہے۔ یہ کافی بڑی مقدار میں آندھرا پردیش کے الوری سیتا راما راجو ضلع میں تیار کی جاتی ہے۔ تقریباً 1.5 لاکھ قبائلی خاندان اس کی کاشت سے وابستہ ہیں۔

پی ایم مودی نے کہا، ’’میں نے تمام ہم وطنوں اور دنیا کے تمام ممالک کے لوگوں سے اپیل کی ہے کہ وہ اپنی ماں کے ساتھ یا ان کے نام پر ایک پودا لگائیں۔ مجھے یہ دیکھ کر بہت خوشی ہوئی کہ ماں کی یاد میں یا ان کے اعزاز میں پودا لگانے کی مہم تیزی سے آگے بڑھ رہی ہے۔‘‘

ایک خاص قسم کی چھتری کے بارے میں بات کرتے ہوئے انہوں نے کہا کہ یہ چھتری ہمارے کیرالہ میں تیار کی جاتی ہے۔ انہوں نے کہا کہ کیرالہ کی ثقافت میں چھتریوں کی خاص اہمیت ہے۔ چھتریاں وہاں کی بہت سی روایات اور رسومات کا ایک اہم حصہ ہیں، لیکن میں جس چھتری کی بات کر رہا ہوں وہ 'کارتھمبی چھتریاں' ہیں اور وہ کیرالہ کے اٹاپاڈی میں تیار کی جاتی ہیں۔

پی ایم مودی نے کہا، ’’آج میں ہم وطنوں کا شکریہ ادا کرتا ہوں کہ انہوں نے ہمارے آئین اور ملک کے جمہوری نظام پر اپنے غیر متزلزل اعتماد کا اعادہ کیا ہے۔ 2024 کا الیکشن دنیا کا سب سے بڑا الیکشن تھا۔ اتنا بڑا الیکشن دنیا کے کسی ملک میں نہیں ہوا۔ اس الیکشن میں 65 کروڑ لوگوں نے ووٹ دیا۔’’