جے این یو میں 4 سال بعد اسٹوڈنٹس یونین الیکشن کا اعلان، 22 مارچ کو ووٹنگ اور 24 کو نتائج

دہلی میں واقع ملک کی مشہور جواہر لال نہرو یونیورسٹی میں طلبا یونین کے انتخاب کا اعلان کیا گیا ہے۔ 4 سال بعد ہونے والے اس انتخاب میں 22 مارچ کو ووٹ ڈالے جائیں گے جبکہ 24 مارچ کو نتائج کا اعلان کیا جائے گا۔ جے این یو کی انتخابی کمیٹی کے ذریعے جاری کردہ پروگرام کے مطابق پیر کو ووٹر لسٹ شائع کی جائے گی اور منگل تک اس میں درستگی کی جا سکے گی۔

یونیورسٹی کی جانب سے دی گئی معلومات کے مطابق 14 مارچ سے طلبا اپنے کاغذات نامزدگی داخل کر سکتے ہیں، جس کے بعد امیدواروں کی حتمی فہرست 16 مارچ کو شائع کی جائے گی۔ یونیورسٹی جنرل باڈی میٹنگ (یو جی بی ایم) 20 مارچ کو ہوگی، اس کے بعد صدارتی عہدے کے دعویدار یونیورسٹی طلبا سے خطاب کریں گے۔ نوٹس کے مطابق طلبا یونین کے انتخاب کے لیے ووٹنگ 22 مارچ کو ہوگی۔ ووٹوں کی گنتی 24 مارچ کو ہوگی جس کے بعد نتائج کا اعلان کیا جائے گا۔

واضح رہے کہ جے این یو اسٹوڈنٹس یونین کا آخری انتخاب 2019 میں ہوا تھا، جس میں بائیں بازو کی امیدوار آئشی گھوش نے کامیابی حاصل کی تھی۔ اس کے بعد کووڈ کی وجہ سے انتخاب ملتوی کر دیا گیا تھا۔ اس بار طلبا یونین کا یہ انتخاب 4 سال بعد ہونے جا رہا ہے۔ اس انتخاب کے تئیں یونیورسٹی میں طلبا کے تمام گروپس میں کافی جوش و خروش ہے۔