کیا انوپم کھیر کو منموہن کی تعریف مہنگی پڑی! دباؤ میں چھوڑا FTII چیئرمین عہدہ

سنجیدہ اداکاری کے لئے مشہور بالی ووڈ اداکار انوپم کھیر نے دیگر کاموں میں مصروفیت کا حوالہ دیتے ہوئے فلم اینڈ ٹیلی ویژن انسٹی ٹیوٹ آف انڈیا (ایف ٹی آئی آئی) کے چیئرمین عہدہ سے استعفی دے دیا۔ لیکن کچھ لوگ اس کو مودی حکومت کے دباؤ کے سبب دیا گیا استعفیٰ تصور کر رہے ہیں۔انوپم کھیر نے اطلاعات و نشریات کے وزیر راج وردھن راٹھور کو بھیجے اپنے استعفی میں کہا ہے کہ بین الاقوامی منصوبوں میں مصروف ہونے کی وجہ سے وہ انسٹی ٹیوٹ میں اپنی ذمہ داری اچھے طریقے سے انجام نہیں دے پائیں گے اس لئے وہ اپنے عہدے سے استعفی دے رہے ہیں۔

دلچسپ بات یہ ہے کہ چند دن پہلے ہی انوپم کھیر نے فلم ’دی ایکسیڈینٹل پرائم منسٹر‘ کی شوٹنگ مکمل کی تھی اور منموہن سنگھ سے معافی مانگتے ہوئے ٹوئٹ کیا تھا کہ’’یہ فلم ایک بہت بڑا سبق رہا اور ایک بات طے ہے کہ تاریخ آپ کو غلط نہیں سمجھے گا۔‘‘ 63 سالہ مشہور اداکار نے یہ بھی کہا تھا کہ پردے پر منموہن سنگھ کی زندگی کو ایک سال تک جینا ان کے لیے بے حد شاندار تجربہ تھا۔ انھوں نے مانا کہ ایک سال تک منموہن سنگھ کا کردار نبھانے کے بعد ان کے تئیں ان کی سوچ میں تبدیلی آئی ہے۔

انوپم کھیر کے اس بیان کو اس لیے زیادہ اہمیت کا حامل قرار دیا جاتا ہے کیونکہ وہ کٹر مودی حامی ہیں اور خود کو ’مودی کا چمچہ‘ کہلانے میں فخر محسوس کرتے رہے ہیں۔ ان کے منھ سے منموہن کی تعریف یقیناً حیران کرنے والی ہے اور وزیر اعظم نریندر مودی کو پسند نہ آنے والی ہے۔ کچھ لوگوں کا کہنا ہے کہ اس بیان کے بعد غالباً انوپم کھیر پر مودی حکومت کا دباؤ بنا ہوگا اوراسی لئے مصروفیت کا بہانہ بنا کر انھوں نے استعفیٰ دے دیا۔

بہر حال، ایف ٹی آئی آئی چیئرمین عہدہ کے استعفیٰ نامہ میں انوپم کھیر نے لکھا ہے کہ انہیں ایک بین الاقوامی ٹی وی شو کی وجہ سے انہیں 2018 سے 2019 کے درمیان تقریبا ًنو ماہ تک اور اس کے بعد بھی امریکہ میں رہنا ہوگا۔ انوپم کھیر نے کہا ہے کہ ممتاز ایف ٹی آئی آئی صدر کے عہدے پر رہنا ان کے لیے اعزاز کی بات ہے اور اس عہدے پر رہتے ہوئے انہیں بہت کچھ سیکھنے کو ملا ہے۔ تاہم بین الاقوامی طور پر ملنے والے کام کی وجہ سے، وہ انسٹی ٹیوٹ میں زیادہ وقت نہیں دے سکیں گے ، اس وجہ سے وہ استعفی دے رہے ہیں۔ اس مصروفیت کو دیکھتے ہوئے وہ انسٹی ٹیوٹ میں فعال طور پر منسلک نہیں رہ سکیں گے اور ایسے میں عہدے پر رہنا طالب علموں، مینجمنٹ ٹیم اور ان کے لیے مناسب نہیں ہے۔ انوپم کھیر کو اداکار گجندر چوہان کی جگہ انسٹی ٹیوٹ کاصدر مقرر کیا گیا تھا۔ چوہان کی تقرری کی وجہ سے زبردست ہنگامہ ہوا تھا۔

(یو این آئی ان پٹ کے ساتھ)