2014 کے بعد 22 کروڑ درخواستیں موصول ہوئیں، لیکن ملازمت محض 7 لاکھ 22 ہزار نوجوانوں کو ملی، مرکز نے خود کیا انکشاف

ملازمتوں میں تخفیف کو لے کر اپوزیشن کے الزامات کے درمیان حکومت نے پارلیمنٹ میں یہ جانکاری دی کہ 2014 کے بعد سے اب تک 7 لاکھ 22 ہزار 311 عہدوں پر مرکزی حکومت میں ملازمتیں دی گئی ہیں۔ وزارت برائے پرسونل میں ریاستی وزیر جتیندر سنگھ نے تحریری جواب میں یہ بھی بتایا کہ ملازمتوں کے لیے 22 کروڑ سے زیادہ درخواستیں موصول ہوئی تھیں۔

حکومت کے ذریعہ دیئے گئے تحریری جواب کے مطابق 15-2014 میں ایک لاکھ 30 ہزار 423 لوگوں کو ملازمتیں ملیں، 16-2015 میں ایک لاکھ 11 ہزار 807، 17-2016 میں ایک لاکھ ایک ہزار 333، 18-2017 میں 76 ہزار 147، 19-2018 میں 38 ہزار 100، 20-2019 میں ایک لاکھ 47 ہزار 96، 21-2020 میں 78 ہزار 555 اور 22-2021 میں 38 ہزار 850 لوگوں کو ملازمتیں دی گئیں۔

واضح رہے کہ اپوزیشن لگاتار بے روزگاری اور مہنگائی کو لے کر حکومت پر سوال اٹھا رہا ہے۔ کانگریس کا کہنا ہے کہ بی جے پی ہر سال 2 کروڑ لوگوں کو روزگار دینے کا وعدہ کر اقتدار میں آئی، لیکن وہ اپنا وعدہ پورا نہیں کر رہی۔ اپوزیشن کے حملہ آور رخ کی وجہ سے پارلیمنٹ میں رخنہ پیدا ہو رہا ہے۔ حالانکہ حکومت نے ایک بیان میں کہا کہ وہ ہر ایک مسئلہ پر تبادلہ خیال کے لیے تیار ہے۔

کانگریس کے سابق صدر راہل گاندھی نے آج ملک میں بڑھتی بے روزگاری کے تعلق سے ایک ٹوئٹ بھی کیا ہے۔ انھوں نے لکھا ہے کہ ’’مہنگائی اور بے روزگاری پر سوال پوچھنے کے جرم میں ’راجہ‘ نے 57 اراکین پارلیمنٹ کو گرفتار اور 23 اراکین پارلیمنٹ کو معطل کیا۔ راجہ کو جمہوریت کے مندر میں سوال سے ڈر لگتا ہے، لیکن تاناشاہوں سے لڑنا ہمیں بخوبی آتا ہے۔‘‘