’اڈانی اور چین کے رشتے بہت گہرے ہیں، کرونولوجی کو سمجھیے‘، کانگریس نے جاری کی ویڈیو

مرکز کی مودی حکومت پر حملہ کا سلسلہ کانگریس کے ذریعہ لگاتار جاری ہے۔ تازہ حملہ ایک ویڈیو کے ذریعہ کیا گیا ہے جس میں اڈانی اور چین کے درمیان گہرے رشتوں کو ظاہر کرنے کی کوشش کی گئی ہے۔ اس ویڈیو میں گوتم اڈانی کو ’دیش دروہی‘ (غدارِ وطن) بھی ٹھہرایا گیا ہے۔ اس ویڈیو کو کانگریس نے اپنے آفیشیل ٹوئٹر ہینڈل سے شیئر کرتے ہوئے کیپشن میں لکھا ہے کہ ’’اڈانی اور چین کے رشتے بہت گہرے ہیں۔ کرونولوجی سمجھیے۔‘‘

کانگریس نے اس ویڈیو میں بزنس مین گوتم اڈانی اور چین کے درمیان رشتوں کو واضح کرنے کی کوشش کی ہے۔ ویڈیو اَپلوڈ ہونے کے محض ڈھائی گھنٹے کے اند رہی اس 1 منٹ 9 سیکنڈ کی ویڈیو پر 1 لاکھ 30 ہزار سے زیادہ ویوز آ چکے ہیں۔ اتنا ہی نہیں، اس ویڈیو کو تقریباً 2.25 ہزار لوگ ری ٹوئٹ بھی کر چکے ہیں۔

ویڈیو کے آغاز میں دعویٰ کیا جا رہا ہے کہ اڈانی اور چین کے درمیان بہت گہرے رشتے ہیں۔ اس ویڈیو کو دیکھ کر یقیناً کئی لوگ حیران رہ جائیں گے۔ ویڈیو میں ایک چارٹ کی مدد سے یکے بعد دیگرے اڈانی اور چین کے درمیان موجود رشتوں کا انکشاف کیا گیا ہے۔ ویڈیو میں دکھایا گیا ہے کہ ایک چینی کمپنی ہے جس کا نام ہے پی ایم سی، اس کمپنی کے مالک مارس چانگ ہیں۔ مارس ایک چینی کاروباری چانگ چنگ لنگ کے بیٹے ہیں۔

ویڈیو میں یہ بھی بتایا گیا ہے کہ چانگ چنگ لنگ دراصل اڈانی کے بھائی ونود اڈانی کے دوست ہیں اور ان کے پارٹنر ہیں۔ چانگ چنگ لنگ اور ونود اڈانی 2005 میں سنگاپور میں ایک ساتھ ایک ہی پتہ پر رہتے تھے۔ چینی کمپنی پی ایم سی کا دفتر اڈانی کی کمپنی کے پتہ پر ہی رجسٹرڈ ہے۔ ویڈیو کے مطابق چینی کمپنی پی ایم سی نے 2006 سے 2012 کے درمیان انکم ٹیکس ریٹرن بھرنے کے لیے اڈانی گروپ کا ای میل استعمال کیا ہے۔ کانگریس نے ویڈیو میں انکشاف کیا ہے کہ ایک چینی کمپنی اور چینی شخص اڈانی کے ساتھ مل کر ملک کے ضروری پروجیکٹس پر کام کر رہے ہیں۔ یہ ہندوستان کی قومی سیکورٹی کے ساتھ کھلواڑ ہے۔ ویڈیو میں کہا گیا ہے کہ اڈانی دشمن ملک کے ساتھ مل کر جو کچھ بھی کر رہے ہیں وہ ملک سے غداری ہے۔