بدلاپور عصمت دری معاملے میں دونوں ملزمین دوبارہ گرفتار !

بدلاپور عصمت دری معاملے میں اسکول کے صدر اُدے کوتوال اور سکریٹری تشار آپٹے کو جمعرات کو کلیان کورٹ میں ضمانت مل گئی، لیکن ضمانت ملنے کے بعد پولس نے ان دونوں کو ایک اور معاملے میں دوبارہ گرفتار کر لیا ہے۔ پولس ان دونوں کو جمعہ کو دوبارہ کلیان کورٹ میں پیش کرے گی۔

بدلاپور عصمت دری کیس کے دو ملزمین کو کل رات رائے گڑھ ضلع کے کرجت علاقے سے پولیس نے گرفتار کیا تھا۔ آج پولس نے دونوں کو کلیان کورٹ میں پیش کیا۔ عدالت نے دونوں ملزمان کو 17 اکتوبر تک عدالتی تحویل میں بھیج دیا۔ جس کے بعد دونوں کے وکیل نے فوری طور پر ان کی ضمانت کی درخواست عدالت میں پیش کی۔ عدالت نے فوری طور پر دونوں کی ضمانت منظور کر لی۔ اس کے بعد پولیس نے دونوں کو ایک اور کیس میں عدالت سے ہی گرفتار کر لیا۔ پولیس ان دونوں کو کل دوبارہ عدالت میں پیش کرنے جا رہی ہے۔

قابل ذکر ہے کہ بدلا پور عصمت دری کیس کے یہ دونوں ملزم پچھلے ڈیڑھ ماہ سے مفرور تھے۔ بدلاپور عصمت دری کیس میں پولیس نے ملزم اکشے شندے کو گرفتار کیا تھا اور عدالت نے اسے عدالتی حراست میں بھیج دیا تھا۔ لیکن 23 ستمبر کو ممبرا علاقے میں پولیس مقابلے میں اکشے شندے زخمی ہو گئے اور پولس اسے کلوا کے شیواجی ہسپتال لے گئی، جہاں ڈاکٹروں نے اکشے کو مردہ قرار دیا تھا۔ اسی معاملے میں پولیس نے ادے کوتوال اور تشار آپٹے کو بھی ملزم بنایا تھا۔ لیکن ان دونوں نے پہلے کلیان کورٹ اور پھر بامبے ہائی کورٹ میں پیشگی ضمانت کی درخواست دائر کی تھی جسے دونوں عدالتوں نے مسترد کر دیا تھا۔ اس کے بعد پولیس نے ان دونوں کو کل رات کرجت سے گرفتار کرلیا۔