دہلی کے اراکین اسمبلی اور وزراء کے لیے خوشخبری، تنخواہ میں اضافہ کی تجویز اسمبلی سے پاس

دہلی اسمبلی کے مانسون اجلاس کے پہلے دن پیر کو عآپ حکومت نے وزراء، اراکین اسمبلی، چیف وہپ، اسپیکر، ڈپٹی اسپیکر اور حزب مخالف لیڈر کی تنخواہ اور بھتوں میں اضافہ کرنے کی تجویز کو پاس کر دیا۔ عآپ حکومت کی تجویز کو مرکزی حکومت نے بھی اس سال مئی میں منظوری دے دی تھی، جس سے اس کو اسمبلی میں پیش کرنے کا راستہ صاف ہو گیا تھا۔

دہلی کی عام آدمی پارٹی کی حکومت کے وزیر قانون کیلاش گہلوت نے ایوان میں تنخواہ اضافہ سے متعلق پانچ ترمیمی بل کو پیش کیا جنھیں ایوان میں موجود اراکین اسمبلی نے اتفاق رائے سے پاس کر دیا۔ عآپ حکومت کا دعویٰ ہے کہ دہلی کے اراکین اسمبلی کی تنخواہ ملک میں سب سے کم ہے۔ اسمبلی سے تجویز کے پاس ہونے کے بعد دہلی کے اراکین اسمبلی کی تنخواہ میں 12 ہزار روپے سے 30 ہزار روپے ماہانہ تک کا اضافہ ہو جائے گا۔ اس کے علاوہ کئی دیگر بھتوں میں بھی اضافہ ہوگا۔ اس طرح مجموعی طور پر تنخواہ موجودہ 54 ہزار روپے سے بڑھ کر 90 ہزار روپے ماہانہ ہو جائے گا۔

عآپ حکومت نے گزشتہ سال اگست میں ہی تنخواہ بڑھانے کی تجویز مرکزی حکومت کے پاس بھیجی تھی، جسے مرکز نے اس سال مئی میں منظوری دی تھی۔ بعد ازاں لیفٹیننٹ گورنر نے بھی گزشتہ مہینے اس تجویز کو منظوری دے دی تھی، جس سے بل کو اسمبلی میں پیش کرنے کا راستہ صاف ہو گیا تھا۔