کرناٹک انتخابی نتائج میں نہیں نظر آئی عام آدمی پارٹی

کرناٹک اسمبلی انتخابی نتائج سے آنے والے رجحانات جہاں کانگریسیوں کے چہرے پر خوشی کی لہر لے کر آئے ہے وہیں بی جے پی اور جے ڈی ایس کے لئے تو بری خبر ہے ہی لیکن سب سے زیادہ بری خبر کیجریوال کی عام آدمی پارٹی کے لئے ہے کیونکہ ان رجحانات میں اس کا کوئی ذکر نہیں ہے۔

دہلی اور پنجاب میں مکمل اکثریت کے ساتھ حکومت بنانے والی پارٹی کو حال ہی میں قومی پارٹی کا درجہ بھی ملا اور کہا یہ جا رہا تھا کہ اس پارٹی کی مقبولیت نوجوان اور تعلیم یافتہ ووٹروں میں سب سے زیادہ ہے لیکن کرناٹک کے رجحانات سے ایسے اشارے نہیں مل رہے اور یہ پارٹی کرناٹک میں کہیں موجود نظر نہیں آ رہی۔ 

کانگریس ہمیشہ سے عام آدمی پارٹی کو بی جے پی کی ’بی‘ٹیم کہتی رہی ہے اور اس کے رہنماؤں کا الزام ہے کہ وہ بی جے پی کی مدد کے لئے انتخابات میں حصہ لیتی ہے۔ گجرات میں اس بات کو شدت کے ساتھ کانگریس نے اٹھایا تھا، کیونکہ وہاں عام آدمی پارٹی کے کھڑے ہونے سے بی جے پی کو زبردست فائدہ ہوا تھا اور اس نے اب تک سب سے زیادہ سیٹوں پر کامیابی حاصل کی تھی۔ 

ویسے جالندھر لوک سبھا سیٹ کے لئے ہوئے ضمنی انتخابات میں عام آدمی پارٹی کی کامیابی صاف ہے اور مبصرین کا ماننا ہے کہ ریاست میں جس کی حکومت ہوتی ہے عوام اس کے امیدوار کے ہی حق میں ووٹ دیتے ہیں۔ ان کا کہنا ہے کہ کانگریس کی کرناٹک میں اچھی کارکردگی کا سب سے زیادہ نقصان عام آدمی پارٹی کو ہو سکتا ہے کیونکہ دھیرے دھیرے اس کی شبیہ پر سوال کھڑے ہونے لگے ہیں اور ان کے کئی وزراء بھی جیل میں بند ہیں۔