خود کو صدارتی امیدوار قرار دینے کے مطالبہ کے ساتھ سپریم کورٹ پہنچا ایک شخص، عدالت نے منسوخ کی عرضی

نئی دہلی: سپریم کورٹ نے جمعہ کو ایک خود ساختہ ماہر ماحولیات کی طرف سے صدر کے خلاف اشتعال انگیز الزامات کے ساتھ خود کو غیر متنازعہ صدارتی امیدوار بنانے کی درخواست کو مسترد کر دیا۔ جسٹس ڈی وائی چندر چوڑ اور ہیما کوہلی نے کشور جگن ناتھ ساونت کی ایک مفاد عامہ کی عرضی پر غور کرنے سے انکار کر دیا، جو ذاتی طور پر پیش ہوئے۔

درخواست گزار نے صدر کے عہدے کے لیے غیر متنازعہ امیدوار بنائے جانے کی استدعا کی اور 2004 سے تنخواہ اور الاؤنسز کا بھی مطالبہ کیا، کیونکہ اسے کاغذات نامزدگی داخل کرنے کی اجازت نہیں دی گئی تھی۔ عدالت عظمیٰ نے کہا کہ یہ درخواست غیر سنجیدہ اور قانون کے عمل کا غلط استعمال ہے۔ اس کے ساتھ ہی عدالت نے عرضی گزار سے کہا کہ وہ ایسی عرضی دائر کرنے سے گریز کرے بلکہ اس کے بجائے اس شعبے کی پیروی کرے جس میں اسے مہارت ہے۔

سپریم کورٹ نے درخواست گزار کو بتایا کہ اس نے صدر کے خلاف اشتعال انگیز الزامات لگائے ہیں اور یہ بھی چاہتے ہیں کہ انہیں صدر کی تنخواہ اور الاؤنسز ادا کیے جائیں۔ بنچ نے کہا، ’’اعلیٰ ترین آئینی دفتر کے خلاف لگائے گئے الزامات بغیر کسی ذمہ داری کے ہیں اور انہیں ریکارڈ سے خارج کر دیا گیا ہے۔‘‘

عدالت سے عرضی کو قبول کرنے کی درخواست کرتے ہوئے، ساونت نے کہا کہ انہیں یقین ہے کہ ان کا مقدمہ آئین کے بنیادی اصولوں کی نئی وضاحت کرے گا اور انہیں حکومت کی پالیسیوں اور طریقہ کار کی مخالفت کرنے کا پورا حق حاصل ہے۔ ساونت نے تقریباً دو دہائیوں کے تجربے کے ساتھ ایک ماہر ماحولیات ہونے کا دعویٰ کیا۔

بنچ نے کہا کہ انہیں پالیسیوں اور طریقہ کار سے لڑنے کا حق ہے اور وہ باہر سڑک پر کھڑے ہو کر تقریر بھی کر سکتے ہیں لیکن اس طرح کی فضول درخواست دائر کر کے عدالت کا وقت ضائع نہیں کر سکتے۔ ساونت نے تاہم اصرار کیا کہ وہ ایک ماہر ماحولیات ہیں اور انہیں گزشتہ تین صدارتی انتخابات میں نامزدگی داخل کرنے کی اجازت نہیں دی گئی تھی۔

جسٹس ڈی وائی چندر چوڑ کی بنچ نے کہا کہ ان معاملات کا فیصلہ کرنا ان کا فرض ہے اور انہوں نے درخواست کو خارج کرنے کا حکم دیا۔ سپریم کورٹ نے رجسٹری کو ہدایت دی کہ مستقبل میں اسی موضوع پر ساونت کی عرضی پر غور نہ کیا جائے۔