روپے کی تاریخی گراوٹ، پہلی مرتبہ 80 روپے فی ڈالر تک پہنچا

نئی دہلی: ہندوستانی روپیہ منگل 19 جولائی کو پہلی بار 80 روپے فی ڈالر کی سطح تک گر گیا۔ یہ روپے کی اب تک کی کم ترین سطح ہے۔ جیسا کہ گزشتہ چند دنوں سے روپے کی قدر میں مسلسل کمی دیکھی جا رہی تھی، اس کے بعد یہ خدشہ ظاہر کیا جا رہا تھا کہ روپیہ 80 ڈالر سے تجاوز کر جائے گا۔ پچھلے سیشن میں روپیہ 79.97 روپے فی ڈالر پر بند ہوا تھا۔ اس کے مقابلے میں، آج یہ 79.98 روپے کی سطح پر کھلا۔ تاہم اس کے فوراً بعد یہ 80.05 روپے فی ڈالر کی سطح تک گر گیا۔

روپے نے 80.05 کی سطح کو چھونے کے بعد 79.93/94 روپے فی ڈالر کی سطح پر آ گیا۔ اس دوران امریکی ڈالر گزشتہ ایک ہفتے کی نچلی سطح سے تھوڑا اوپر درج ہو رہا تھا۔

اگر ہم پچھلے سیشن کی بات کریں تو پیر کے روز انٹربینک فارن ایکسچینج مارکیٹ میں امریکی کرنسی کے مقابلے روپیہ 16 پیسے کم ہو کر 79.98 فی ڈالر پر بند ہوا۔ ٹریڈنگ کے دوران یہ مختصر وقت کے لیے 80 روپے فی ڈالر کی نفسیاتی کم ترین سطح پر چلا گیا تھا۔ تاجروں کا کہنا ہے کہ روپے کی گراوٹ کی وجہ خام تیل کی قیمتوں میں اضافہ اور مارکیٹ سے غیر ملکی سرمائے کا مسلسل اخراج ہے۔

روپیہ جمعہ کے روز ڈالر کے مقابلے میں 17 پیسے بڑھ کر 79.82 روپے فی ڈالر پر بند ہوا تھا۔ مارکیٹ کے تجزیہ کاروں نے توقع ظاہر کی ہے کہ ڈالر-روپے کی اسپاٹ قیمت مختصر مدت میں 79.79 اور 80.20 کی حد میں ہوگی۔

پیر کے روز لوک سبھا میں ایک تحریری جواب میں وزیر خزانہ نرملا سیتا رمن نے کہا کہ آر بی آئی کے اعداد و شمار کے مطابق 31 دسمبر 2014 کی شرح کے مقابلے روپیہ 25 فیصد گر گیا ہے۔ 31 دسمبر 2014 کو ڈالر کے مقابلے روپیہ 63.33 تھا جو 11 جولائی 2022 کو 79.41 روپے فی ڈالر ریکارڈ کیا گیا ہے۔ یہ 25 فیصد تک کی گراوٹ ہے۔

وزیر نے کہا کہ کئی عالمی عوامل جیسے روس-یوکرین تنازعہ، خام تیل کی بڑھتی قیمتوں اور دباؤ میں عالمی اقتصادی حالات امریکی ڈالر کے مقابلے ہندوستانی روپے کی تنزلی کی وجوہات میں شامل ہیں۔