بچوں کے نام پر گھنٹہ گھر کے احتجاج کو ختم کرنے کی سازش!

لکھنؤ: قومی شہریت قانون کے خلاف حسین آباد کے گھنٹہ گھر میں جاری دو ہفتے سے مظاہرے کو ختم کرنے کے لئے ایک اور ترکیب تلاش کی گئی ہے۔ بظاہر بچوں کی ہمدردی کا دم بھرتے ہوئے یو پی کے اطفال کورٹ نے اپنے ممبروں کے دستخط سے میڈیا کے ذریعے ایک نوٹس جاری کیا، جس میں حسین آباد میں جاری مظاہرے میں شامل بچوں کی شمولیت پر پابندی عائد کر دی ہے۔ نوٹس میں کہا گیا ہے کہ اٹھارہ برس سے کم عمر کے ان بچوں کو وہاں سے ہٹا لیا جائے، کیونکہ ان کی تعلیم میں پریشانیاں پیدا ہوتی ہیں۔

در اصل حسین آباد کے گھنٹہ گھر میں جو مظاہرہ دو ہفتے سے جاری ہے وہاں بڑی تعداد میں اپنے بچوں کے ساتھ شامل ہو رہی ہیں۔ کچھ خواتین مظاہرین کی گودیوں میں ان کے شیر خوار بچے بھی ہیں اور کچھ ان کی انگلی پکڑ کر لوگوں کی توجہ کا مرکز بنے ہوئے ہیں۔ سرکاری سطح پر کئی بار یہ کوشش کی گئی کہ اس احتجاج کو ناکام کردیا جائے اور مختلف طرح سے وہاں کبھی ظلم و زیادتی، کبھی اپنے مخبروں کو بھیج کر تحریک کو توڑنے کی کوشش کی گئی۔

بچوں کی بہبود سمیتی لکھنؤ کی جانب سے جاری ایک نوٹس کی بہرحال سرکاری طور پر تا دم تحریر تصدیق نہیں ہوسکی ہے۔ مگراس نوٹس میں کہا گیا ہے کہ کشور نیائے (بچوں کی دیکھ ریکھ اور تحفظ) قانون 2015 کے مطابق ہر وہ شخص جو 18 سال سے کم عمر کا ہے وہ ’’بچہ“ ہی کہلائے گا۔ ادھینیم کی دفعہ 3(4) کے مطابق بچوں اور بچیوں کے بہترین مفادات کے پیش نظر بال کلیان سیمیتی کو کام کرنا ہے جس سے بچوں کا بچپن، ان کی تعلیم اور صحت کا دھیان رکھا جا سکے۔ اس صورت میں بال کلیان سیمیتی لکھنؤ متفقہ طور سے یہ حکم دیتی ہے کہ سبھی کنبے فوری طور سے جو اپنے بچوں کو لے کر لکھنؤ کے گھنٹہ گھر کے نزدیک دھرنا مظاہرہ کر رہے ہیں وہ بلا تاخیر اپنے بچوں کو مظاہرہ کے مقام سے گھر بھیجیں، تاکہ ان کے دن بھر کے کام جاری رہ سکیں۔ کئی بچے اپنا اسکول چھوڑ کر مظاہرہ کے مقام پر ہیں اور ان کے صحیح وقت پر کھانا کھانے اور کھیل کا انتظام بھی بگڑ چکا ہے۔

لہذا بچوں کے عظیم مفادات کے پیش نظر ان کی ذہنیت پر منفی اثرات اثر انداز نہ ہوں اس لئے ان بچوں کو فی الفور دھرنے کی جگہ سے ہٹایا جائے، بصورت دیگر کشور نیائے ادھینیم کی دفعہ 75 کے تحت ان کے خلاف کارروائی کی جائے گی۔ اس نوٹس پر چار ممبروں کے دستخط ہیں، احتجاج کرنے والی خواتین کا کہنا ہے کہ ہم کو کسی ایسے نوٹس کی نہ خبر ہے اور نہ ہی اس کو تسلیم کریں گے۔ اگر سرکار یا کسی نجی ادارے کو ہمارے بچوں کی اتنی ہی فکر ہوتی تو پر امن احتجاج میں روکاوٹیں نہ پیدا کی جاتیں، نہ ہمارے سر پر سایہ ہے اور نہ ہی ہم کو سرد راتوں میں الاؤ جلانے کی اجازت ہے، اس لئے یہ ایک سازش کے تحت کیا جارہا ہے تاکہ جو خواتین اپنے بچوں کے ساتھ مظاہرہ کر رہی ہیں ان کی تعداد کو کم کیا جاسکے۔