مختار انصاری کے قریبی کملیش سنگھ 'پردھان' کے مکان پر چلا بلڈوزر

غازی پور: اترپردیش کے ضلع غازی پور کے شہر کوتوالی تھانہ علاقے میں شہ زور لیڈر مختار انصاری کے معاون رہے کملیش سنگھ 'پردھان' کا کروڑ روپئے کی غیر قانونی تعمیرات کو اتوار کی صبح زمیں دوز کر دیا گیا۔ ایس ڈی ایم صدر نے بتایا کہ مکان کے غیر قانونی تعمیر کے سلسلے میں کافی لمبے عرصے سے مقدمہ چل رہا تھا۔ چار مئی 2022 کو عدالت کے فیصلے کے بعد انہیں مکان کی تعمیر کو گرانے کا کئی بار نوٹس دیا گیا۔ آج اسی ضمن میں غیر قانونی تعمیرات کو زمیں دوز کر دیا گیا ہے۔

ذرائع کے مطابق کملیش سنگھ مختار انصاری گینگ کے سرگرم رکن تھے۔ انہدامی کاروائی کی نوٹس ہفتہ کی شام تعمیل کرائی گئی تھی۔ آج صبح چھ بجےسے ہی تقریباً آدھا درج بلڈوزر مکان کو منہدم کرنے میں لگ گئے۔ ایس ڈی ایم صدر اور سی او سٹی شہر کوتوال سمیت سینکڑوں پولیس اہلکار موقع پر موجود تھے۔

قابل ذکر ہے کہ اس عمارت میں گزشتہ 20 سالوں سے کمرشل ٹیکس/ اسٹیٹ ٹیکس کا دفتر بھی کام کر رہا تھا۔ جسے انہدامی کارروائی کے بعد متعلقہ افسران کی نگرانی میں سارے سامان کو نکال کر آئی ٹی آئی کالج کے ہاسٹل میں رکھوایا گیا ہے۔