’اڑان‘ اسکیم کے 8 سال مکمل، 1.44 کروڑ مسافروں کو ملا فائدہ

’اڑان‘ اسکیم کے آٹھ سال پورے ہونے پر شہری ہوابازی کے وزیر رام موہن نائیڈو نے اپنے بیان میں کہا کہ ’’آج اڑان کے آٹھ سال مکمل ہو رہے ہیں۔ ’اڑان‘ وزیر اعظم نریندر مودی کا ڈریم اسکیم تھا۔ اڑان کی کامیابی پورے ملک کی کامیابی ہے۔ 2014 میں 74 ایئرپورٹس تھے اور آج ہمارے ملک میں 157 ایئرپورٹس ہیں۔ 2017 میں ’اڑان‘ کے تحت پہلی فلائٹ شملہ سے دہلی آئی تھی اور آج 1 کروڑ 44 لاکھ مسافر ’اڑان‘ کے تحت مستفید ہو چکے ہیں۔ اس اسکیم کے تحت 2 لاکھ 84 ہزار فلائٹس نے اب تک ’اڑان‘ بھری ہے۔‘‘

مرکزی وزیر نے اپنی بات کو جاری رکھتے ہوئے آگے کہا کہ ’’ہم نے ملک میں مشکل مقامات پر ایئرپورٹس بنائے ہیں۔ ’اڑان‘ کے تحت 601 نئے ایئر روٹس (ہوائی راستے) آپریشنل ہوئے ہیں۔ ’اڑان‘ نے ملک کی معاشی ترقی میں اہم کردار ادا کیا ہے۔ علاقائی ایئر پورٹس نے ملکی سیاحت کی تصویر بدل دی ہے۔ ‘‘ وہ مزید کہتے ہیں کہ ’اڑان‘ 3.0 کے تحت سیاحتی علاقوں کو فروغ مل رہا ہے۔ دربھنگہ ایئر پورٹ پر 2 فلائٹس سے اس اسکیم کی شروعات ہوئی تھی۔ آج 70 فلائٹس اڑان بھر رہی ہیں۔ ہم لوگ دربھنگہ میں نیا ٹرمنل بنا رہے ہیں۔ اگلے دس سال میں ہم لوگ علاقائی رابطوں میں مزید اضافے پر کام کر رہے ہیں۔

واضح رہے کہ ’اڑان‘ اسکیم کی شروعات اکتوبر 2016 میں ہوئی تھی۔ اس اسکیم کا اصل مقصد علاقائی رابطوں میں وسعت پیدا کرنا ہے۔ اس اسکیم کے تحت 72 ایئر پورٹس کو جوڑنے کا ارادہ ہے جن میں وہ ہوائی اڈے بھی شامل ہیں جہاں سے کافی کم طیارے پرواز بھرتی ہیں۔

ساتھ ہی ایک مقصد یہ بھی ہے کہ اس اسکیم کو اتنا کفایتی بنایا جائے کہ عام لوگ بھی آسانی سے ہوائی سفر کر سکیں۔ اس کے علاوہ ایسے مقامات پر بھی ہوائی خدمات مہیا کرائی جائیں جہاں پرواز کی خدمات کم ہیں یا بالکل بھی نہیں ہے۔ اس اسکیم کے تحت تقریباً 500 کلومیٹر کے ایک گھںٹے کے سفر کا ہوائی کرایہ 2500 روپئے ہے۔