آئین کی 75ویں سالگرہ کے موقع پر صدر دروپدی مرمو دونوں ایوانوں سے کریں گی خطاب

ہندوستان آج 26 نومبر کو آئین کی 75ویں سالگرہ منا رہا ہے، جو قوم کے لیے ایک اہم موقع ہے۔ اس موقع پر صدر دروپدی مرمو پارلیمنٹ کے سینٹرل ہال میں لوک سبھا اور راجیہ سبھا کے اراکین سے خطاب کریں گی۔ یہ تقریب ہندوستان کے آئین کو اپنانے کی 75ویں سالگرہ کے موقع پر منعقد کی جا رہی ہے اور اس کے ساتھ ہی آئینی اقدار کو فروغ دینے کے لیے سال بھر جاری رہنے والی تقریبات کا آغاز ہوگا۔

تقریب میں نائب صدر اور راجیہ سبھا کے چیئرمین جگدیپ دھنکھڑ، وزیر اعظم نریندر مودی، لوک سبھا اسپیکر اوم برلا، مرکزی وزراء اور دیگر معزز شخصیات شرکت کریں گی۔ اوم برلا اس تقریب کا استقبالیہ پیش کریں گے، جبکہ آئین کی تاریخی اہمیت اور اس کی ترقی پر مبنی ایک مختصر فلم بھی پیش کی جائے گی۔

پارلیمانی امور کے وزیر کرن رجیجو نے اعلان کیا کہ سال بھر جاری رہنے والے ان پروگراموں کا نعرہ ’ہمارا آئین، ہمارا وقار' ہوگا۔ انہوں نے کہا کہ صدر کے ساتھ، ہندوستان اور بیرون ملک کے لوگ آئین کی تمہید پڑھیں گے۔

ہندوستانی آئین کو آئین ساز اسمبلی نے 26 نومبر 1949 کو اپنایا تھا، جو بعد میں 26 جنوری 1950 کو نافذ ہوا۔ اس دن کو 19 نومبر 2015 کو جاری کردہ نوٹیفکیشن کے تحت ہر سال 'یوم آئین' کے طور پر منایا جاتا ہے۔ اس کا مقصد شہریوں میں آئینی اقدار کو فروغ دینا ہے۔

اہم تقریبات

- آئین کی 75ویں سالگرہ کی مناسبت سے ایک یادگاری سکہ اور ٹکٹ جاری کیا جائے گا۔

- 'بھارت کے سمودھان کا نرمان: ایک جھلک' اور 'بھارت کے سموددھان کا نرمان اور اس کی گوروشالی یاترا' کے عنوان سے کتابوں کا اجرا ہوگا۔

- آئین کی آرٹ سے متعلق ایک کتابچہ بھی پیش کیا جائے گا۔

- آئین کی سنسکرت اور میتھلی زبان میں نقول جاری کی جائیں گی۔

یہ تقریبات صرف دہلی تک محدود نہیں ہوں گی بلکہ ریاستوں اور مرکز کے زیر انتظام علاقوں میں بھی خصوصی تقاریب منعقد ہوں گی، جہاں گورنر، لیفٹیننٹ گورنر اور وزرائے اعلیٰ شرکت کریں گے۔

آئین کی اہمیت اجاگر کرنے کے لیے 14 اپریل سے 28 اپریل تک 'آئین سوابھیمان یاترا' نکالی جائے گی۔ اس یاترا میں بی آر امبیڈکر کے آئین سازی میں کردار کو اجاگر کیا جائے گا اور یہ یاترائیں ایس سی/ایس ٹی آبادی والے علاقوں میں منعقد کی جائیں گی۔