ہریانہ کے ریواڑی میں بھیانک سڑک حادثہ، 6 لوگوں کی موت

ہریانہ کے ریواڑی میں گزشتہ رات ایک خوفناک سڑک حادثہ ہوا جس میں 6 افراد کی موت ہوگئی جبکہ 6 دیگر زخمی ہوگئے۔ پولیس کے مطابق یہ واقعہ ریواڑی کے کھرکھڑا گاؤں کے قریب پیش آیا۔ بتایا جاتا ہے کہ حادثے کے شکار ہونے والے تمام لوگ دہلی کے ایک ہی کیمپس میں رہنے والے تھے اور کھاٹو شیام سے دہلی لوٹ رہے تھے ۔

نیوز پورٹل ’آج تک‘ کے مطابق راستے میں یہ لوگ اپنی کار کا ٹائر تبدیل کرنے لگے۔ اسی اثنا میں پیچھے سے آ رہی ایک تیز رفتار کار نے انہیں ٹکر ماردی۔ یہ ٹکر اس قدر شدید تھی کہ دونوں گاڑیوں کے پرخچے اڑ گئے۔ اس حادثے میں 4 خواتین سمیت 6 لوگوں کی موت ہوگئی۔ مرنے والوں کی لاش کو پوسٹ مارٹم کے لیے بھیج دیا گیا جبکہ زخمیوں کو علاج کے لیے اسپتال میں داخل کرایا گیا ہے۔ واضح رہے کہ گزشتہ 5 دن قبل 6 مارچ کو ہی  ریواڑی میں ایک اور بھیانک سڑک حادثہ ہوا تھا جس میں 5 لوگوں کی موت ہو گئی تھی۔