شیو راج حکومت میں یونیورسٹی طالبات کو کیا گیا ننگا

شیوراج حکومت میں طالبات کے ساتھ شرمناک حرکت کرنے کا ایک معاملہ سامنے آیا ہے جس کے بعد ایک بار پھر بی جے پی حکمراں مدھیہ پردیش کی شبیہ کو دھچکا پہنچا ہے۔ مدھیہ پردیش کے ساگر میں ڈاکٹر ہری سنگھ گور یونیورسٹی کے ہاسٹل میں چیکنگ کے نام پر 40 طالبات کے کپڑے اتروانے کا شرمناک معاملہ سامنے آیا ہے۔ طالبات نے ہاسٹل وارڈن پر کپڑے اتروا کر چیکنگ کرنے کا الزام عائد کیا ہے۔ طالبات کے مطابق ہاسٹل میں استعمال کیا گیا سینٹری نیپکن ملا تھا جس کے بعد ہاسٹل وارڈن نے طالبات کے کپڑے اتروا کر تلاشی لی۔

ہاسٹل احاطہ میں استعمال کیا ہوا نیپکن ملنے سے وارڈن کافی غصے میں تھی اور سبھی سے اس کے بارے میں پوچھ رہی تھی۔ جب انھیں اس کا جواب نہیں مل سکا تو یہ پتہ کرنے کے لیے کہ کس نے گندا نیپکن پھینکا ہے، وارڈن نے طالبات کی تلاشی لینی شروع کر دی۔ تلاشی کے دوران وارڈن نے طالبات کے کپڑے تک اتروا لیے۔

اس معاملے میں یونیورسٹی کے وائس چانسلر آر پی تیواری نے افسوس ظاہر کیا ہے۔ انھوں نے اپنے بیان میں اس واقعہ کو افسوسناک اور قابل تنقید بتایا ہے۔ انھوں نے کہا کہ ’’طالبات میری بیٹیوں کی طرح ہیں اور میں ان سے اس عمل کے لیے معافی مانگتا ہوں۔‘‘

یونیورسٹی کے وائس چانسلر نے اس سلسلے میں مزید کہا کہ ’’میں نے سبھی طالبات کو یقین دہانی کرائی ہے کہ اس معاملے میں کارروائی کی جائے گی اور اگر وارڈن کو قصوروار پایا گیا تو ان کے خلاف کارروائی بھی ہوگی۔‘‘