تلنگانہ: ’پانی پوری‘ کھا کر 40 بچے پڑے بیمار، اسپتال میں داخل

حیدر آباد:تلنگانہ کے عادل آباد ضلع میں 40 بچوں کو پانی پوری کھانا مہنگا پڑ گیا۔ پانی پوری کھا کر کے یہ بچے بیمار پڑ گئے اور پھر انھیں فوری طور پر اسپتال میں داخل کرانا پڑا۔ بتایا جاتا ہے کہ کل یعنی پیر کی شام عادل آباد ٹاؤن کے سندریا نگر اور خورشید نگر میں گول گپے یعنی پانی پوری فروخت کرنے والا آیا۔بعض بچے اور بڑے افراد نے اس کے پاس سے گول گپے خریدے اور ان کو کھایا، تاہم کچھ دیر بعد ہی ان میں سے بیشتر کی صحت خراب ہوگئی۔

موصولہ اطلاعات کے مطابق گول گپے کھانے والوں نے پیٹ میں درد،الٹیوں اور اسہال کی شکایت کی جس کے بعد ان کو فوری طورپر رمس اسپتال منتقل کیاگیا۔متاثرین میں زیادہ تر چھوٹے بچے شامل ہیں۔اس واقعہ کی اطلاع ملتے ہی ضلع میڈیکل اینڈ ہیلتھ افسر اسپتال پہنچے جنہوں نے ان متاثرین کی عیادت کی اور ڈاکٹرس سے ان کے علاج کے سلسلہ میں تفصیلات پوچھیں۔علاوہ ازیں ضلع میڈیکل اینٹھ ہیلتھ افسر نے بچوں کے والدین سے درخواست کی کہ وہ باہر کے کھانے کی اشیا سے بچوں کو بچائیں۔