شہریت قانون مظاہرہ: پھلواری شریف میں فائرنگ کرنے والے 3 ’شرپسند‘ گرفتار!

پھلواری شریف کے عیسیٰ پور واقع پائپ لائن روڈ کے قریب جمعہ کی شب مبینہ طور پر ہوئی تین راؤنڈ فائرنگ معاملہ میں پولس نے تین لوگوں کو گرفتار کیا ہے۔ پولس ذرائع سے حاصل ہو رہی خبروں کے مطابق گرفتار لوگوں کے نام سوربھ عرف اتل، کندن کمار اور راہل ہیں۔ سوربھ اور کندن کے بارے میں بتایا جا رہا ہے کہ وہ اس فائرنگ واقعہ میں شامل تھے جب کہ راہل کو شبہ کی بنیاد پر گرفتار کیا گیا ہے۔

بتایا جا رہا ہے کہ رات تقریباً ساڑھے دس بجے پھلواری شریف میں شہریت ترمیمی قانون کے خلاف گزشتہ 28 دنوں سے دھرنے پر بیٹھے مظاہرین میں افرا تفری مچ گئی جب کسی نے مبینہ طور پر تین راؤنڈ فائرنگ کی۔ اس واقعہ سے دہشت کا ماحول علاقے میں پیدا ہو گیا تھا اور خبر ملنے کے بعد فوری طور پر پولس بھی وہاں پہنچ گئی تھی۔ پولس ذرائع نے شروعاتی جانچ کے بعد کچھ میڈیا والوں سے بات چیت کے دوران کہا کہ 3 موٹر سائیکل پر 7 شرپسند عناصر سوار تھے جو فائرنگ کرتے ہوئے فرار ہو گئے۔ اس واقعہ کی جانچ وہاں موجود سی سی ٹی وی کیمرے سے حاصل ویڈیوز کو سامنے رکھ کر ہو رہی ہے۔

تازہ ترین اطلاعات کے مطابق پٹنہ کے سینئر ایس پی اوپیندر شرما پھلواری شریف تھانہ پہنچے اور اس کے بعد اس علاقہ کا بھی انھوں نے دورہ کیا جہاں شہریت ترمیمی قانون اور این آر سی کے خلاف دھرنا پر لوگ بیٹھے ہوئے ہیں اور گزشتہ شب ہوائی فائرنگ کا واقعہ سامنے آیا۔

واضح رہے کہ کچھ لوگ فائرنگ واقعہ کو بہار اسمبلی انتخابات سے جوڑ کر دیکھ رہے ہیں۔ دراصل دہلی اسمبلی انتخابات سے پہلے بی جے پی وزراء اور لیڈروں کے ذریعہ کئی اشتعال انگیز بیانات دئیے گئے تھے اور جامعہ ملیہ اسلامیہ و شاہین باغ میں ہو رہے شہریت ترمیمی قانون مخالف مظاہرے میں فائرنگ کے واقعات بھی پیش آئے تھے۔ لوگوں کا کہنا ہے کہ اس کے ذریعہ ووٹ پولرائز کرنے اور ماحول کو خراب کرنے کی کوشش کی گئی تھی۔ اب بہار اسمبلی انتخابات میں بھی کچھ ایسا ہی کرنے کی کوشش نظر آ رہی ہے۔ حالانکہ انتخابات میں ابھی چھ مہینے سے زیادہ باقی ہیں لیکن ابھی سے نفرت کا ماحول پیدا کرنے کی کوشش شروع ہو گئی ہے۔

بہر حال، میڈیا ذرائع سے موصول ہو رہی خبروں کے مطابق پھلواری شریف میں گزشتہ ایک مہینے سے لوگ سی اے اے، این آر سی و این پی آر کے خلاف دھرنا پر بیٹھے ہوئے ہیں۔ جمعہ کی دیر رات مظاہرہ کے مقام پر کچھ لوگ ہوائی فائرنگ کرتے ہوئے فرار ہو گئے۔ اس واقعہ کی خبر جب مقامی تھانہ کو دی گئی تو پولس کی ایک ٹیم نے وہاں کا دورہ کیا۔ پھلواری شریف تھانہ انچارج رفیق رحمٰن نے میڈیا سے بات کرتے ہوئے فائرنگ واقعہ کی تصدیق کی اور کہا کہ جائے وقوع سے ایک کھوکھا برآمد کیا گیا ہے۔