بابری مسجد شہادت کی برسی: مسلمان منا رہے یومِ سیاہ، ایودھیا میں حفاظت کے پختہ انتظامات

ایودھیا: بابری مسجد کی شہادت کی 28 ویں برسی ایودھیا میں حفاظت کے پختہ انتظام کیے گئے ہیں۔ پولیس سپرنٹنڈنٹ (شہر) وجے پال سنگھ نے اطلاع دیتے ہوئے بتایا کہ ایودھیا میں بابری مسجد کی برسی کے موقع پر سکیورٹی چاک و چوبند کرنے کے ساتھ چوکسی بڑھادی گئی ہے۔

انہوں نے بتایا کہ ایودھیا میں یومیہ پولیس فورس کے علاوہ چھ دسمبر کواضافی پولیس فورس تعینات کی گئی ہے جس میں پی اے سی کی کئی کمپنی شامل ہیں۔ انہوں نے بتایا کہ ضلع کے چہار جانب نصب کی گئی بندشوں پر بھی چیکنگ کرنے کے بعد ہی کسی کو داخل ہونے دیا جا رہا ہے۔

وجے پال سنگھ کے مطابق بابری مسجد کے مقام پر تعمیر ہو رہے مندر کے آس پاس بھی اضافی سکیورٹی فورس تعینات کی گئی ہے۔ انہوں نے بتایا کہ مشہور ہنومان گڑھی مندر، کنک بھون مندر سمیت مختلف مندروں میں بھی سیکیورٹی انتظامات بڑھا دیئے گئے ہیں کیونکہ ایودھیا میں دہشت گردانہ واقعات کا خدشہ ہمیشہ بنا رہتا ہے۔

پولیس سپرنٹنڈنٹ سٹی نے بتایا کہ اتوار کو کسی بھی تنظیم نے کوئی پروگرام کرنے کی درخواست نہیں دی ہے اور نہ ہی کوئی پروگرام مسلم سماج کی جانب سے اور نہ ہی ہندو تنظیم کی جانب سے آیا ہے اس لیے ایودھیا پرسکون ہے۔

مسلم مجلس کے ریاستی صدر محمد ندیم صدیقی اور انڈین مسلم سماج کے حاجی محمد اسماعیل انصاری نے گزشتہ روز کہا ہے کہ ملک کے آئین و جمہوریت، عدلیہ کی بالادستی کو کچلتے ہوئے چھ دسمبر 1992 کو بابری مسجد شہید کر دی گئی تھی۔ کل یوم سیاہ و یوم سوگ کے طور پر منایا جائے گا۔

انہوں نے لوگوں سے اپیل کرتے ہوئے کہا کہ کووڈ-19 کے گائیڈ لائن کی پیروی کرتے ہوئے اس دن اجتماعی و ذاتی طور سے مسجدوں اور گھروں میں بازو پر سیاہ پٹی باندھ کر اظہار سوگ کریں جس سے ملک میں آئین و جمہوریت کو بحال کرنے کے عزم کو مضبوطی مل سکے۔