عام انتخاب: مونگیر کے دو پولنگ مراکز پر بے ضابطگی معاملہ میں 20 انتخابی افسر معطل

پٹنہ: الیکشن کمیشن نے بہار میں چوتھے مرحلہ میں مونگیر پارلیمانی حلقہ میں ووٹنگ کے دوران دو پولنگ مراکز پر ہوئی گڑبڑ کے معاملے میں پریزائیڈنگ افسر اور پولس عملہ سمیت بیس لوگوں کو معطل کر دیا ہے۔

ریاست کے چیف الیکشن افسر ایچ ۔ آر۔ شری نیواس نے آج یہاں بتایاکہ مونگیر لوک سبھا حلقہ میں لکھی سرائے اسمبلی حلقہ کے پولنگ مرکز نمبر 339 اور 340 پر چوتھے مرحلہ میں ووٹنگ کے دوران ہوئی گڑبڑی کے معاملے کی جانچ چل رہی ہے۔

شری نیواس نے بتایاکہ اس معاملے میں دس نامزد لوگوں پر ایف آئی آردرج کی گئی ہے ۔ وہیں پریزائیڈنگ افسر ، مجسٹریٹ اور پولس عملہ سمیت بیس لوگوں کو معطل کر دیا گیاہے ۔ انھوں نے کہا کہ پولنگ مرکز نمبر 339 اور 340 پر جن لوگوں نے الیکٹرانک ووٹنگ مشین ( ای وی ایم ) سے چھیڑ چھاڑ کی ہے ان لوگوں پر بھی الیکشن کمیشن کارروائی کرے گا۔

واضح رہے کہ چوتھے مرحلہ میں پولنگ کے دوران 29 اپریل 2019 کو مونگیر لوک سبھا حلقہ میں لکھی سرائے اسمبلی حلقہ کے بوتھ نمبر 339 اور 340 پر بوگس ووٹنگ اور صحافی کے ساتھ مار پیٹ کے سلسلے میں کمیشن کو شکایت ملی تھی ۔ اسی بنیاد پر جانچ رپورٹ کی بنیاد پرکاروائی جاری ہے۔