امسال 1,75,000 عازمین حج کریں گے، ہندوستان اور سعودی عرب کے مابین ہوا معاہدہ

حکومت ہند نے سعودی عرب کے ساتھ حج 2023 کے لیے ایک دو طرفہ معاہدے پر دستخط کیے ہیں۔ اس معاہدے کے تحت امسال ہندوستان سے 175025 عازمین حج ادا کریں گے۔ نیوز پورٹل پر شائع خبر کے مطابق حج کمیٹی کے رکن اعجاز حسین نے بتایا کہ حج 2023 کے فارم بہت جلد دستیاب ہوں گے۔ 

واضح رہے حج کمیٹی آف انڈیا نے اس بات کو یقینی بنانے کے لیے کئی میٹنگیں کی ہیں کہ عازمین حج کو اس سال پچھلے سفر کے مقابلے بہتر سہولیات فراہم ہوں اور مزید امبارکیشن پوانٹس شروع کئے جائیں۔ اعجاز حسین نے کہا کہ اس سال حج کمیٹی آف انڈیا نے تمام خامیوں کو دور کرنے اور اس بات کو یقینی بنانے کے لیے اقدامات کیے ہیں کہ ہندوستان کے تمام عازمین حج پہلے کی نسبت بہت آسانی سے فریضہ حج ادا کریں۔ واضح رہے اس سال خواتین بھی بغیر محرم کے حج کر سکتی ہیں۔ 

انہوں نے کہا کہ ہر حاجی کو زم زم کا پانی بغیر کسی پریشانی کے ملے گا۔ اعجاز حسین نے کہا کہ آن لائن حج فارم بہت جلد دستیاب ہوں گے اور منتخب عازمین کی فہرست کم سے کم وقت میں دستیاب کر دی جائے گی۔ انہوں نے کہا کہ عازمین کو سامان پیک کرنے کے لیے کافی وقت ملے گا اور متعلقہ حج ہاؤس پر بھی انہیں دوستانہ طریقے سے سہولت فراہم کی جائے گی۔ عازمین حج کی تربیت کا شیڈول پیشگی دستیاب کر دیا جائے گا۔

حج کے لئے سعودی عرب نے جو قوانین مرتب کئے ہیں اس کے مطابق لوگ اس وقت تک حج پر نہیں جا سکتے جب تک کہ ان کے پاس حج کا ویزہ نہ ہو یا سعودی عرب کے اندر رہائش نہ ہو۔ سعودی عرب کی وزارت نے گزشتہ ہفتے اعلان کیا تھا کہ اس نے مملکت میں مقیم عازمین حج کے لیے 2023 میں حج کے لیے رجسٹریشن کھول دیئے ہیں، پیکجز کی قیمت 3,984 ریال ($1,062) سے شروع ہو رہی ہے۔ گھریلو عازمین (عرب کے رہائشی) کے پاس حج پیکج کے اخراجات ایک بار میں ادا کرنے کے بجائے تین قسطوں میں ادا کرنے کا اختیار ہے، جیسا کہ پچھلے سالوں میں ہوا تھا۔ وزارت نے کہا کہ ممکنہ حجاج اپنی جگہ محفوظ کرنے کے لیے کل لاگت کا 20 فیصد جزوی ادائیگی کر سکتے ہیں۔ ڈاون پیمنٹ رجسٹریشن کی تاریخ کے 72 گھنٹے کے اندر کی جانی چاہیے۔ دوسری اور تیسری قسط لاگت کا 40 فیصد ہوگی۔ ادائیگیاں وقت پر ہونے پر عازمین کی حج کی حیثیت "تصدیق" ہو جائے گی۔ ادائیگیاں مکمل نہ ہونے کی صورت میں بکنگ منسوخ کر دی جائے گی۔

 دوسری جانب ہندوستانی حج کے خواہش مند حضرات اپلائی کرنے کے لئے hajcommittee.gov.in کے مطابق درخواست دینے کے لیے صرف ایک کمپیوٹر یا انٹرنیٹ کنکشن والا اسمارٹ فون، ایک درست موبائل فون نمبر اور ایک درست ای میل آئی ڈی کی ضرورت ہوگی۔ انہیں پہلے مرحلے میں حج درخواست کے لئے رجسٹریشن کرانا ہوگا۔ حج فارم بھرنا ہوگا اور تصویر اپلوڈ کرنی ہوگی۔ فیس کی ادائیگی کرنے کے بعد اس کا پرنٹ ضرور نکال لیں۔