وائناڈ میں لینڈ سلائڈ کی تباہی نے 17 کنبوں کو پوری طرح سے ختم کر دیا

کیرل کے وزیراعلیٰ پنارائی وجین نے منگل کو کہا کہ 30 جولائی کو وائناڈ کے 4 گاؤں میں ہوئے لینڈ سلائڈ کے تباہ کن واقعہ میں 17 کنبوں کے سبھی اراکین ہلاک ہوگئے، جس میں کُل 65 لوگ شامل ہیں۔ انہوں نے بتایا کہ اب تک 179 لاشوں کی شناخت ہو چکی ہے جبکہ 199 افراد اب بھی لاپتہ ہیں اور 91 کے ڈی این اے نمونوں کی جانچ کے نتیجے آنے باقی ہیں۔ 59 لوگوں کے اہل خانہ کو 6-6 لاکھ روپے کا معاوضہ دیا گیا ہے جبکہ 699 کنبوں کو عبوری راحت کے طور پر 10000 روپے دیے گئے ہیں۔ 172 کنبوں کو آخری رسومات کی ادائیگی کے لیے 10000 معاوضہ دیا گیا ہے۔

وائناڈ ریہیبلیٹیشن پروگرام کے سلسلے میں وجین نے اطمینان کا اظہار کرتے ہوئے کہا کہ کام میں تیزی لانے کے لیے جلد ہی چیف سکریٹری کی صدارت میں ایک میٹنگ منعقد ہوگی جس میں ماہرین اور مقامی عوامی نمائندے شامل ہوں گے۔ میٹنگ کے بعد ری ہیبلیٹیشن پروگرام کو آخری شکل دی جائے گی۔ راحت اور بچاؤ کام پر انہوں نے بتایا کہ 4 متاثرہ گاؤں میں 729 کنبوں کو مختلف راحت کیمپوں میں لے جایا گیا ہے۔ ابھی 219 لوگ اس کیمپ میں ہیں جبکہ باقی لوگوں کو کرایے کے گھروں یا رشتہ داروں کے گھروں میں لے جایا گیا ہے۔ حکومت اعلان کے مطابق انہیں کرایہ دے گی۔ اس سلسلے میں متاثرہ علاقوں اور اس کے آس پاس 75 ریاستی حکومت کے کوارٹر تیار ہونے اور انہیں 83 کنبوں کے درمیان تقسیم کرنے کی بھی جانکاری دی گئی۔  اس کے ساتھ ہی دیگر 179 کرایہ کے گھر تیار ہونے اور 105 کو منظوری دیے جانے کی بھی بات کہی گئی ہے۔

کیرل کے وزیراعلیٰ نے مزید کہا کہ زندہ بچے لوگوں کو واپس لانے کے لیے بینکنگ شعبہ کی مدد کی ضرورت ہے کیونکہ زراعت ہی ان کا سب سے اہم کاروبار ہے۔ لوگوں نے کئی طرح کے قرض لیے ہیں انہیں سب سے زیادہ نقصان ہوا ہے اس لیے ان کے قرض معاف کر دیے جانے چاہئیں۔ بینکوں سے متعلق ڈائرکٹر ڈویژن آخری فیصلہ لیں گے۔ 30 جولائی کے بعد کاٹے گئے ای ایم آئی اسی کھاتے میں واپس جمع کیے جائیں گے۔ انہوں نے بتایا کہ جلد ہی بغیر کسی ضمانت کے 25000 تک کے کھپت قرض کو منظوری دی جائے گی اور اس کی ادائییگی کے لیے 30 مہینے کی مہلت ہوگی۔