اکالی دل سے وابستہ 15 خاندانوں نے پارٹی کو دیا جھٹکا، سبھی کانگریس میں شامل

پنجاب کے کابینہ وزیر او پی سونی کی سربراہی میں جمعہ کے روز امرتسر شہر کے تقریباً 15 خاندانوں نے اکالی دل چھوڑ کر کانگریس کی رکنیت حاصل کر لی۔ یہ عمل اکالی دل کے لیے ایک بہت بڑا جھٹکا تصور کیا جا رہا ہے کیونکہ ریاست میں ہونے والے الیکشن کے پیش نظر یہ ایک بہت بڑی سرگرمی ہے۔ بتایا جاتا ہے کہ یہ سبھی 15 کنبہ کے لوگ اکالی دل کی پالیسیوں سے ناراض تھے اور کانگریس حکومت کے ذریعہ ریاست میں کیے گئے کاموں سے متاثر ہو کر پارٹی بدلنے کا فیصلہ لیا۔

کابینہ وزیر او پی سونی نے اس تعلق سے کہا کہ ’’ریاست میں کانگریس حکومت کی جانب سے کئے گئے ترقیاتی کاموں کو دیکھتے ہوئے یہ کنبے کانگریس میں شامل ہوئے ہیں۔ شہرمیں متعدد ترقیاتی منصوبے جاری ہیں جو جلد مکمل ہو جائیں گے۔‘‘ انہوں نے مزید کہا کہ کانگریس پارٹی نے ہمیشہ ترقی کی سیاست کی ہے اور ہر طبقہ کے لوگوں کے ساتھ مل کر ریاست کو آگے بڑھانے کے لیے پرعزم ہے۔