تمل ناڈو میں شراب پینے سے 10 افراد جاں بحق، وزیر اعلیٰ اسٹالن نے سی بی-سی آئی ڈی جانچ کا دیا حکم

تمل ناڈو میں شراب نوشی کے بعد دس لوگوں کی موت کا معاملہ سامنے آیا ہے۔ بتایا جا رہا ہے کہ معاملہ تمل ناڈو کے کلاکوریچی کا ہے جہاں شراب پینے کے بعد کم از کم 10 لوگوں کی موت واقع ہو گئی ہے۔ یہ خبر پھیلنے کے بعد فوری کارروائی کرتے ہوئے ضلع کلکٹر شرون کمار جاٹوتھ کا تبادلہ کر دیا گیا ہے۔ ایم ایس پرشانت کو کلاکوریچی ضلع کا نیا کلکٹر مقرر کیا گیا ہے۔ کلاکوریچی کے ایس پی سمئے سنگھ مینا کو بھی معطل کیے جانے کی خبریں سامنے آ رہی ہیں۔ ان کی جگہ رجت چترویدی کو نیا پولیس سپرنٹنڈنٹ مقرر کیا گیا ہے۔ کئی دیگر پولیس افسران کے خلاف بھی کارروائی ہوئی ہے اور انھیں معطل کر دیا گیا ہے۔

شراب نوشی کے بعد دس افراد کے ہلاک ہونے کے بعد نہ صرف کئی افسران کے خلاف کارروائی ہوئی ہے، بلکہ اس پورے معاملے کی تفتیش کو لے کر بھی بڑا قدم اٹھایا گیا ہے۔ تمل ناڈو کے وزیر اعلیٰ ایم کے اسٹالن نے شراب پینے سے ہوئی اموات معاملے میں سی بی-سی آئی ڈی جانچ کا حکم صادر کر دیا ہے۔

میڈیا رپورٹس کے مطابق معاملہ 18 جون کو کلاکوریچی ٹاؤن پولیس اسٹیشن کی سرحد کے اندر کروناپورم علاقے میں پیش آیا۔ بتایا جا رہا ہے کہ متاثرین میں سے بیشتر لوگ دِہاڑی مزدور تھے۔ انھوں نے مبینہ طور پر کروناپورم کی شراب دکان سے شراب خریدی تھی۔ اندیشہ ظاہر کیا جا رہا ہے کہ شراب زہریلی تھی جس کو پینے سے کم از کم 10 لوگوں کی موت ہو چکی ہے۔