چھتیس گڑھ کے سکما میں سکیورٹی فورسز کی بڑی کارروائی، 10 نکسلی ہلاک

رائے پور: چھتیس گڑھ کے سکما ضلع میں کونٹا کے بھیجی علاقے میں سکیورٹی فورسز اور نکسلیوں کے درمیان ہونے والی مڈبھیڑ میں 10 نکسلی مارے گئے۔ یہ کارروائی ڈسٹرکٹ ریزرو گارڈ (ڈی آر جی) کی ٹیم نے کی۔ اطلاعات کے مطابق، سیکیورٹی فورسز نے تین خودکار رائفلوں سمیت کئی ہتھیار برآمد کیے ہیں۔

مڈبھیڑ اس وقت شروع ہوئی جب ڈی آر جی کی ٹیم کو اطلاع ملی کہ کئی نکسلی اڈیشہ کے راستے چھتیس گڑھ میں داخل ہو رہے ہیں۔ اس معلومات پر فورسز نے علاقے کا محاصرہ کر کے کارروائی کی۔ دونوں جانب سے فائرنگ کا تبادلہ صبح کے وقت ہوا۔ بستر کے انسپکٹر جنرل آف پولیس پی سندرراج نے مڈبھیڑ کی تصدیق کرتے ہوئے کہا کہ ہلاک ہونے والے نکسلیوں کی تعداد اور برآمد شدہ ہتھیاروں کی مکمل تصدیق ابھی جاری ہے۔

اس کارروائی پر چھتیس گڑھ کے وزیر اعلیٰ وشنو دیو سائے نے کہا کہ ان کی حکومت نکسلیوں کے خلاف زیرو ٹالرنس پالیسی پر عمل کر رہی ہے۔ انہوں نے مزید کہا کہ سکما میں امن و ترقی کو یقینی بنانا ان کی حکومت کی اولین ترجیح ہے۔ وزیر اعلیٰ نے سیکیورٹی فورسز کی کامیابی پر ان کی تعریف کی اور کہا کہ بستر میں امن و ترقی کا دور واپس آ رہا ہے۔

یہ مڈبھیڑ حکومت کے نکسلیوں کے خلاف جاری مہم کا حصہ ہے، جس کا مقصد خطے میں امن و امان کی بحالی اور ترقیاتی منصوبوں کو آگے بڑھانا ہے۔

(یو این آئی ان پٹ کے ساتھ)