نظم ’انھیں جنون‘... (شاعر: گوہر رضا)

انھیں جنون

انھیں جنون کسی بزم میں اماں نہ رہے

کوئی رہے نہ رہے بزمِ مئے کشاں نہ رہے

انھیں جنون کہ رشتوں کو توڑ ڈالیں سب

ہمیں یہ فکر کوئی بھی خفا خفا نہ رہے

انھیں جنون کہ دل پاش پاش ہو جائیں

ہمیں یہ فکر کوئی زخم بے دوا نہ رہے

انھیں جنون کہ ہر شام شامِ غم میں ڈھلے

ہمیں یہ فکر کہ دل شام سے بجھا نہ رہے

انھیں جنون کہ دنیا سہم سہم کے جیے

ہمیں یہ فکر کہ کوئی سزا جزا نہ رہے

انھیں جنون کہ ہر شہر شہرِ آتش ہو

ہمیں یہ فکر کہ عالم سجا سجا سا رہے

انھیں جنون کہ کوئی بھی سربلند نہ ہو

ہمیں یہ فکر کہ کوئی سر جھکا جھکا نہ رہے

انھیں جنون کہ روشن خیال کوئی نہ ہو

ہمیں یہ فکر کہیں دورِ جاہلاں نہ رہے

انھیں جنون کہ ہر اک زباں پہ تالا ہو

ہمیں یہ فکر کہ کوئی بھی بے زباں نہ رہے

(نوٹ: گوہر رضا کے فیس بک پوسٹ سے)