آئی پی ایل 2023: سی اے اے-این آر سی کے خلاف پوسٹر منظور نہیں! اسٹیڈیم میں میچ دیکھنے والوں کے لیے گائیڈلائن جاری

انڈین پریمیر لیگ (آئی پی ایل) طویل مدت کے بعد ایک بار پھر اپنے پرانے فارمیٹ میں کھیلا جا رہا ہے۔ اس میں ایک ٹیم کو اپنے گھریلو میدان پر 7 مقابلے کھیلنے کا موقع ملے گا۔ اسی درمیان دہلی، موہالی، حیدر آباد اور احمد آباد میں کھیلے جانے والے مقابلوں کے پیش نظر اسٹیڈیم جا کر میچ کا لطف لینے والے ناظرین کے لیے ایک خاص گائیڈلائن جاری کی گئی ہے۔

میڈیا رپورٹس کے مطابق دہلی، موہالی، حیدر آباد اور احمد آباد شہر میں میچوں کے دوران ناظرین کو اسٹیڈیم کے اندر شہریت ترمیمی قانون (سی اے اے) اور قومی شہریت رجسٹر (این آر سی) کی مخالفت کرتے ہوئے پوسٹر لے کر جانے کی اجازت نہیں دی جائے گی۔ قابل ذکر ہے کہ چنئی سپرکنگز، دہلی کیپٹلز، گجرات ٹائٹنس، لکھنؤ سپر جائنٹس، سنرائزرس حیدر آباد، راجستھان رائلز اور پنجاب کنگز ٹیم کے گھریلو میچوں کی ٹکٹ فروخت کرنے کا حق پے ٹی ایم انسائیڈر کو ملا ہوا ہے۔ ٹکٹ فروختگی کو لے کر پے ٹی ایم انسائیڈر کی طرف سے ممنوعہ سامانوں کی فہرست جاری کی گئی ہے۔ ممنوعہ سامانوں کی اس فہرست میں اس میں سی اے اے اور این آر سی کی مخالفت سے متعلق پوسٹر بھی ہیں۔

سی اے اے اور این آر سی کی مخالفت والے پوسٹر پر پابندی والے حکم سے متعلق خبر رساں ایجنسی پی ٹی آئی کا کہنا ہے کہ ایسا فیصلہ فرنچائزی سے ان کے گھریلو میچوں کو لے کر ٹکٹنگ پارٹنر کے ذریعہ صلاح لینے کے بعد لیا گیا ہوگا۔ حالانکہ بی سی سی آئی سے مشورہ کے بعد ہی ایسا کیا جاتا ہے، جس میں کسی بھی اسپورٹس ایوینٹ کے دوران سیاسی یا دیگر ایشوز کے پوسٹر میدان پر لہرانے کی اجازت نہیں ہوتی ہے۔ اس سلسلے میں بی سی سی آئی کے ایک افسر نے اس سال کے شروع میں کھیلے گئے فیفا ورلڈ کپ کی گائیڈلائنس کو یاد دلایا جس میں اصولوں کے مطابق کسی کو بھی سیاسی، مذہبی یا دیگر کسی طرح کے نعرہ لکھے پوسٹر کو لے کر جانے کی اجازت نہیں تھی۔