آئی پی ایل 2020: متنازعہ بولنگ ایکشن میں سنیل نارئن کو ملی کلین چٹ

انڈین پریمیر لیگ کے 13 ویں سیزن میں کولکاتا نائٹ رائیڈرز کی ٹیم کو بڑی راحت ملی ہے۔ مشتبہ بولنگ ایکشن کے معاملے میں کے کے آر کے اسٹار اسپنر سنیل نارئن کو کلین چٹ مل گئی ہے۔ گزشتہ ہفتے سنیل نارئن کے مشتبہ بولنگ ایکشن کے خلاف شکایت کی تھی۔ اطلاعات کے مطابق آئی پی ایل کی بولنگ ایکشن کمیٹی نے سنیل نارئن کو کلین چٹ دے دی ہے۔ کلین چٹ ملنے کے بعد سنیل نارئن ایک بار پھر کے کے آر کے لئے کھیل سکتے ہیں۔

گزشتہ ہفتے کنگز الیون پنجاب کے خلاف کھیلے گئے میچ میں سنیل نارئن کے خلاف مشکوک بولنگ ایکشن کی شکایت ہوئی تھی۔ اگر سنیل نارئن کو کلین چٹ نہیں ملتی اور ان کے خلاف ایک اور شکایت آ جاتی تو ان کے اس ٹورنامنٹ میں کھیلنے پر پابندی عائد کی جا سکتی تھی۔

واضح رہے کہ سنیل نارئن کا بولنگ ایکشن ہمیشہ تنازعات کا شکار رہا ہے۔ نارائن کے بولنگ ایکشن کے خلاف سب سے پہلی شکایت 2014 میں میں کی گئی تھی۔ 2014 چیمپئنز لیگ کے دوران نارائن کے باؤلنگ ایکشن کے خلاف دو بار شکایت کی گئی تھی اور وہ 2015 کے ون ڈے ورلڈ کپ میں نہیں کھیل پائے تھے۔

آئی پی ایل کے دوران بھی نارئن کا باؤلنگ ایکشن تنازعات میں آیا تھا اور 2015 کے نومبر میں ان کے بولنگ کرنے پر پابندی عائد کردی گئی تھی۔ آئی سی سی نے نارئن کو اپریل 2016 میں دوبارہ بولنگ کرنے کی اجازت تو دے دی لیکن اس سال وہ ٹوئنٹی ٹوئنٹی ورلڈ کپ میں حصہ نہیں لے پائے۔ مارچ 2018 میں پاکستان سپر لیگ میں کھیلتے ہوئے بھی نارئن کے باؤلنگ ایکشن کی شکایات کی گئی تھی۔